ದೆಹಲಿ: ನೀಟ್ ಪರೀಕ್ಷಾ ಅಕ್ರಮ, ನಾಲ್ವರ ಬಂಧನ

‘ತಿಲಕ್ ಮಾರ್ಗ ಪ್ರದೇಶದಲ್ಲಿರುವ ಭಾರತೀಯ ವಿದ್ಯಾ ಭವನ ಮೆಹತಾ ವಿದ್ಯಾಲಯದಲ್ಲಿ ಮೇ 5ರಂದು ನೀಟ್ ಪರೀಕ್ಷೆ ನಡೆದಿತ್ತು. ಆದರೆ, ಪರೀಕ್ಷೆಗೆ ಹಾಜರಾದ ವಿದ್ಯಾರ್ಥಿಗಳ ಬಯೋಮೆಟ್ರಿಕ್, ನೀಟ್ ವೆಬ್‌ಸೈಟ್‌ನಲ್ಲಿ ಈಗಾಗಲೇ ದಾಖಲಾದ ಬಯೋಮೆಟ್ರಿಕ್‌ನೊಂದಿಗೆ ಹೊಂದಾಣಿಕೆಯಾಗಿರಲಿಲ್ಲ. ಈ ಬಗ್ಗೆ ತನಿಖೆ ಕೈಗೊಂಡಾಗ, ಪರೀಕ್ಷಾ ಕೇಂದ್ರದ ಬಳಿಯಿದ್ದ ನಕಲಿ ವಿದ್ಯಾರ್ಥಿಗಳಾದ ಸುಮಿತ್ ಮಾಂಡೊಲಿಯಾ ಮತ್ತು ಕೃಷ್ಣನ್ ಕೇಸರವಾನಿ ಅವರು ಪೊಲೀಸರ ಬಲೆಗೆ ಬಿದ್ದಿದ್ದರು’ ಎಂದು ಶನಿವಾರ ದೆಹಲಿಯ ಪೊಲೀಸ್ ಉಪ ಆಯುಕ್ತ ದೇವೇಶ್ ಕುಮಾರ್ ಮಹ್ಲಾ ತಿಳಿಸಿದ್ದಾರೆ. 

ಈ ಇಬ್ಬರು ಆರೋಪಿಗಳು ನೀಡಿದ ಮಾಹಿತಿ ಮೇರೆಗೆ ಅವರನ್ನು ನಕಲಿ ವಿದ್ಯಾರ್ಥಿಗಳಾಗಿ ಕಳುಹಿಸಿದ್ದ ಪ್ರಭಾತ್ ಕುಮಾರ್ (27) ಮತ್ತು ಕಿಶೋರ್ ಲಾಲ್ (37) ಎಂಬುವರನ್ನು ಶುಕ್ರವಾರ ಬಂಧಿಸಲಾಗಿದೆ. ಈ ಪ್ರಕರಣದ ಗಂಭೀರತೆಯನ್ನು ಅರ್ಥೈಸಿಕೊಂಡು, ಈ ಪ್ರಕರಣವನ್ನು ದೆಹಲಿ ಜಿಲ್ಲಾ ವಿಶೇಷ ಸಿಬ್ಬಂದಿ ಹಾಗೂ ಇನ್‌ಸ್ಪೆಕ್ಟರ್ ಸಂಜಯ್ ಕುಮಾರ್ ಗುಪ್ತಾ ನೇತೃತ್ವದ ತನಿಖೆಗೆ ವಹಿಸಲಾಗಿದೆ ಎಂದು ಡಿಸಿಪಿ ತಿಳಿಸಿದರು. 

ಕುಮಾರ್ ಮತ್ತು ಲಾಲ್ ಕ್ರಮವಾಗಿ ರಾಜಸ್ಥಾನ ಮತ್ತು ಬಿಹಾರದ ಮೂದವರಾಗಿದ್ದು, ವೈದ್ಯಕೀಯ ಕಾಲೇಜಿಗೆ ವಿದ್ಯಾರ್ಥಿಗಳ ಪ್ರವೇಶಾತಿ ಸಮಾಲೋಚಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಈ ಇಬ್ಬರು ನೀಟ್ ಪರೀಕ್ಷೆಗೆ ಅಭ್ಯರ್ಥಿಯ ಪರವಾಗಿ ನಕಲಿ ವಿದ್ಯಾರ್ಥಿ ಕೈಯಲ್ಲಿ ಪರೀಕ್ಷೆ ಬರೆಸಲು ಒಬ್ಬರಿಂದ ತಲಾ ₹20 ಲಕ್ಷದಿಂದ ₹25 ಲಕ್ಷ ಪಡೆಯುತ್ತಿದ್ದರು. ಜತೆಗೆ, ನೀಟ್ ಪರೀಕ್ಷೆ ಬರೆಯುವ ವಿದ್ಯಾರ್ಥಿಯ ಭಾವಚಿತ್ರದೊಂದಿಗೆ ನಕಲಿ ವಿದ್ಯಾರ್ಥಿಯ ಭಾವಚಿತ್ರವನ್ನು ಸಂಯೋಜಿಸುವ ಮೂಲಕ ಮತ್ತೊಂದು ಹೊಸ ಭಾವಚಿತ್ರವನ್ನು ಬಿಡಿಸಿ, ಅದನ್ನು ನೀಟ್ ಪರೀಕ್ಷೆಯ ಅರ್ಜಿ ಮೇಲೆ ಅಂಟಿಸುತ್ತಿದ್ದರು. ಈ ಮೂಲಕ ಪರೀಕ್ಷಕರ ದಿಕ್ಕು ತಪ್ಪಿಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. 

ಮಾಂಡೊಲಿಯಾ ಮತ್ತು ಕೇಸರವಾನಿಯು ಕ್ರಮವಾಗಿ ರಾಜಸ್ಥಾನ ಮತ್ತು ಉತ್ತರಪ್ರದೇಶದವರಾಗಿದ್ದು, ಅನ್ಯ ರಾಜ್ಯಗಳಲ್ಲಿರುವ ವೈದ್ಯಕೀಯ ಕಾಲೇಜಿನ ವಿದ್ಯಾರ್ಥಿಗಳಾಗಿದ್ದಾರೆ. ಈ ಆರೋಪಿಗಳು ಈ ಹಿಂದೆ ನಡೆದ ಪರೀಕ್ಷೆಗಳಲ್ಲೂ ಭಾಗಿಯಾಗಿದ್ದರೆ, ಎಂಬುದರ ಕುರಿತು ಮಾಹಿತಿ ಬಯಲಿಗೆಳೆಯಲು ವಿಚಾರಣೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.