ರಾಜಮಾತೆ ವಿಜಯ ರಾಜೇ ಸಿಂಧಿಯಾ ಜನ್ಮದಿನ: ಗೌರವ ಸಲ್ಲಿಸಿದ ಪ್ರಧಾನಿ

ಸಿಂಧಿಯಾ ಅವರು ಅಕ್ಟೋಬರ್ 12, 1919ರಂದು ಮಧ್ಯಪ್ರದೇಶದ ಸಾಗರ್‌ದಲ್ಲಿ ಜನಿಸಿದರು. ಗ್ವಾಲಿಯರ್ ರಾಜಮನೆತನಕ್ಕೆ ಸೇರಿದ್ದ ಇವರು, ಜನಸಂಘಕ್ಕೆ ಸೇರುವ ಮೊದಲು ಕಾಂಗ್ರೆಸ್‌ನಲ್ಲಿ ತಮ್ಮ ರಾಜಕೀಯ ಜೀವನ ಆರಂಭಿಸಿದ್ದರು. ಬಳಿಕ ಬಿಜೆಪಿಯ ತತ್ವ, ಸಿದ್ದಾಂತಗಳ ಪ್ರಬಲ ಪ್ರತಿಪಾದಕರಾದರು.

‌ಸಿಂಧಿಯಾ ಅವರ ಮೊಮ್ಮಗ ಜ್ಯೋತಿರಾದಿತ್ಯ ಸಿಂಧಿಯಾ ಮೋದಿ ಸರ್ಕಾರದಲ್ಲಿ ಕೇಂದ್ರ ಸಚಿವರಾಗಿದ್ದರೆ, ಇಬ್ಬರು ಪುತ್ರಿಯರಾದ ರಾಜಸ್ಥಾನದ ಮಾಜಿ ಮುಖ್ಯಮಂತ್ರಿ ವಸುಂಧರಾ ರಾಜೇ ಮತ್ತು ಯಶೋಧರ ರಾಜೇ ಕೂಡ ಬಿಜೆಪಿಯಲ್ಲಿದ್ದಾರೆ.

ಸಿಂಧಿಯಾ ಅವರು 1957 ಮತ್ತು 1998ರ ನಡುವೆ ಹಲವು ವರ್ಷಗಳ ಕಾಲ ಸಂಸತ್ ಸದಸ್ಯರಾಗಿ ಸೇವೆ ಸಲ್ಲಿಸಿದ್ದಾರೆ. ಅವರು ವಿವಿಧ ಸಾಮಾಜಿಕ ಚಟುವಟಿಕೆಗಳಲ್ಲಿ ವಿಶೇಷವಾಗಿ ಮಹಿಳಾ ಸಬಲೀಕರಣ ಕ್ಷೇತ್ರದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು. ಶಿಕ್ಷಣದ ಮೂಲಕ ಮಹಿಳೆಯರ ಉನ್ನತಿಗಾಗಿ ಮೀಸಲಾಗಿರುವ ವಿವಿಧ ಸಂಸ್ಥೆಗಳೊಂದಿಗೆ ಕಾರ್ಯ ನಿರ್ವಹಿದ್ದರು. ಇವರು ಜನವರಿ 25, 2001ರಂದು ನಿಧನರಾದರು.