ರಾಜ್ಯದ ವಿವಿಧೆಡೆ ನಾಡಹಬ್ಬದ ಸಂಭ್ರಮ

ಮಂಗಳೂರು: ನವದುರ್ಗೆಯರ ಶೋಭಾಯಾತ್ರೆ ಸಡಗರ

ಮಂಗಳೂರು: ‘ಭಾವೈಕ್ಯದ ದಸರಾ’ ಎಂದೇ ಖ್ಯಾತವಾಗಿರುವ ‘ಮಂಗಳೂರು ದಸರಾ’ ಮಂಗಳವಾರ ವಿಜೃಂಭಣೆಯಿಂದ ನೆರವೇರಿತು. ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದಲ್ಲಿ ಪೂಜೆಗೊಂಡ ಶ್ರೀಶಾರದಾ ದೇವಿ ಹಾಗೂ ನವದುರ್ಗೆಯರ ಮೂರ್ತಿಗಳ ಶೋಭಾಯಾತ್ರೆಯನ್ನು ಕಣ್ತುಂಬಿಕೊಂಡ ಲಕ್ಷಾಂತರ ಮಂದಿ ಭಕ್ತಿ ಭಾವದಲ್ಲಿ ಮಿಂದೆದ್ದರು.

ಶ್ರೀಶಾರದೆ, ದೇವಿಯ ವಿವಿಧ ಅವತಾರಗಳನ್ನು ಬಿಂಬಿಸುವ ಮೂರ್ತಿಗಳು, ಬ್ರಹ್ಮಶ್ರೀ ನಾರಾಯಣ ಗುರು ಮತ್ತು ಮಹಾಗಣಪತಿ ಮೂರ್ತಿ ವಿದ್ಯುದ್ದೀಪಗಳಿಂದ ಅಲಂಕೃತವಾಗಿದ್ದ ರಥದಲ್ಲಿ ಒಂದರ ಹಿಂದೆ ಒಂದರಂತೆ ಸಾಗಿ ಬರುತ್ತಿದ್ದಂತೆಯೇ ಝಗಮಗಿಸುವ ಬೆಳಕಿನ ಲೋಕವೇ ಸೃಷ್ಟಿಯಾಗಿತ್ತು.

ಈ ಮನಮೋಹಕ ದೃಶ್ಯ ರಸ್ತೆಯ ಇಕ್ಕೆಲಗಳಲ್ಲಿ ಸೇರಿದ್ದ ಭಕ್ತರ ಮನದಲ್ಲಿ ಅಚ್ಚಾಯಿತು. ನಗರದೆಲ್ಲೆಡೆ ತಾಸೆ ಪೆಟ್ಟಿನ ಸದ್ದು ಮಾರ್ದನಿಸುತ್ತಿದ್ದರೆ, ‘ಮಾರ್ನೆಮಿ’ಯ ಹುಲಿವೇಷಗಳ ಕುಣಿತದ ಅಬ್ಬರಕ್ಕೆ ಪ್ರೇಕ್ಷಕರು ನಿಬ್ಬೆರಗಾದರು.

ಶೋಭಾಯಾತ್ರೆಯಲ್ಲಿ ರಂಗು ರಂಗಿನ ಸ್ತಬ್ಧಚಿತ್ರಗಳು ಹಾಗೂ ಹುಲಿವೇಷ ತಂಡಗಳು ಪ್ರಮುಖ ಆಕರ್ಷಣೆಯಾಗಿದ್ದವು. ಕರಾವಳಿಯ ಚೆಂಡೆ ವಾದನ, ಡೊಳ್ಳು ಕುಣಿತ, ಸೋಮನ ಕುಣಿತ, ಪೂಜಾ ಕುಣಿತ, ವೀರಗಾಸೆ, ಬ್ಯಾಂಡ್‌ ವಾದನ ತಂಡಗಳು ಮೆರವಣಿಗೆಯ ಮೆರುಗು ಹೆಚ್ಚಿಸಿದವು.

ಊರಿನ ಭಕ್ತಾದಿಗಳಲ್ಲದೇ, ಪರವೂರುಗಳಿಂದ ಬಂದಿದ್ದ ಲಕ್ಷಾಂತರ ಮಂದಿ ಜಾತಿ ಮತ ಭೇದ ಮರೆತು ಉತ್ಸವದಲ್ಲಿ ಭಾಗಿಯಾದರು. ವಿದ್ಯುದ್ದೀಪಗಳಿಂದ ಅಲಂಕೃತ 12 ಕಿ.ಮೀ ಉದ್ದದ ಮಾರ್ಗದುದ್ದಕ್ಕೂ ಜನ ಕಿಕ್ಕಿರಿದು ಸೇರಿದ್ದರು. ವೈಭವೋಪೇತ ದಸರಾ ಮೆರವಣಿಗೆಯ ಸೊಬಗನ್ನು ಆಸ್ವಾದಿಸಲು ಕೆಲವರು ಕಟ್ಟಡಗಳನ್ನೇರಿದ್ದರು.