‘ಹೋರಾಟ’ ಮುಗಿಸಿದ ನಾಗನಗೌಡ: ದೇವೇಗೌಡ, ರಾಮಕೃಷ್ಣ ಹೆಗಡೆಯವರೊಂದಿಗೆ ಒಡನಾಟ

ಗುರುಮಠಕಲ್: ಜೆಡಿಎಸ್ ಪಕ್ಷದ ಆರಂಭದಿಂದಲೂ ಜಿಲ್ಲೆಯಲ್ಲಿ ಪಕ್ಷ ಸಂಘಟನೆ, ಕಾರ್ಯಕರ್ತರ ಜತೆಗೂಡಿ ಹೋರಾಟಗಳನ್ನು ಕಟ್ಟಿ, ಹೋರಾಟಗಳ ಮೂಲಕವೇ ಹೆಗ್ಗುರುತು ಮೂಡಿಸಿಕೊಂಡಿದ್ದ ಗುರುಮಠಕಲ್ ತಾಲ್ಲೂಕಿನ ಕಂದಕೂರ ಗ್ರಾಮದ ಮುತ್ಸದ್ಧಿ ರಾಜಕಾರಣಿ, ಮಾಜಿ ಶಾಸಕ ನಾಗನಗೌಡ ಕಂದಕೂರ (73) ತಮ್ಮ ಬದುಕಿನ ‘ಹೋರಾಟ’ವನ್ನು ಭಾನುವಾರ (ಜ.28) ಬೆಳಿಗ್ಗೆ 10-30ಕ್ಕೆ ಮುಗಿಸಿದ್ದಾರೆ.

ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ಅವರ ಒಡನಾಡಿಯಾಗಿದ್ದ ನಾಗನಗೌಡ ಕಂದಕೂರ ಅವರು ಹಲವು ರಾಜಕೀಯ ಏಳುಬೀಳುಗಳನ್ನು ಕಂಡವರು. ನಿರಂತರ ಸೋಲಿನಲ್ಲೂ ಕಾರ್ಯಕರ್ತರಿಗೆ ಧೈರ್ಯ ತುಂಬುತ್ತಾ ಪಕ್ಷ ಸಂಘಟನೆಯಲ್ಲಿ ತೊಡಗಿದ್ದರು. ತಮ್ಮಿಡಿ ಜೀವನವನ್ನು ಒಂದೇ ಪಕ್ಷದಲ್ಲಿ ಕಳೆಯುತ್ತೇನೆ ಎಂದು ಪದೇ ಪದೆ ಹೇಳುತ್ತಿದ್ದ ಅವರು, ಜೆಡಿಎಸ್ ಪಾಳಯ ಮತ್ತು ದೇವೇಗೌಡ ಕುಟುಂಬದಲ್ಲಿ ವಿಶೇಷ ಸ್ಥಾನವನ್ನು ಹೊಂದಿದ್ದರು.

ಅಣ್ಣ ಸದಾಶಿವರೆಡ್ಡಿ ಕಂದಕೂರ ಅವರಿಂದ ಪ್ರೇರಿತರಾಗಿ ನಾಯಕತ್ವ ಗುಣಗಳನ್ನು ಬೆಳೆಸಿಕೊಂಡ ಅವರು ರಾಜ್ಯದಲ್ಲಿ ಮೊದಲ ಕಾಂಗ್ರೆಸೇತರ ಸರ್ಕಾರ ರಚಿಸಿದ ದೇವೇಗೌಡ, ರಾಮಕೃಷ್ಣ ಹೆಗಡೆ, ಜೆ.ಎಚ್.ಪಟೇಲ್ ಅವರೊಂದಿಗೆ ಒಡನಾಟ ಬೆಳೆಸಿದರು. ರೈತಪರ ಹೋರಾಟಗಳಲ್ಲಿ ದೇವೇಗೌಡರೊಂದಿಗೆ ಪಾಲ್ಗೊಳ್ಳುವ ಮೂಲಕ ರಾಜಕೀಯ ಕ್ಷೇತ್ರದಲ್ಲಿ ಗುರುತಿಸಿಕೊಂಡರು.

ಪಕ್ಷನಿಷ್ಠೆಗೆ ಹೆಸರು: ಜನತಾಪಕ್ಷದೊಂದಿಗೆ ಹೆಜ್ಜೆಹಾಕಿದ್ದ ನಾಗನಗೌಡರು ಮತಕ್ಷೇತ್ರದಲ್ಲಿ ಜನಾಂದೋಲನಗಳನ್ನು ರೂಪಿಸುವುದು ಕಾರ್ಯಕರ್ತರ ಕಷ್ಟಗಳಲ್ಲಿ ಜತೆಯಾಗುವ ಮೂಲಕ ರಾಜಕೀಯ ಜೀವನ ಆರಂಭಿಸಿದರು. ಜನತಾಪಕ್ಷವು ಬಿರುಕು ಬಿಟ್ಟ ನಂತರ ಎಚ್.ಡಿ.ದೇವೇಗೌಡರ ಜನತಾದಳ (ಜ್ಯಾತ್ಯತೀತ)ದೊಂದಿಗೆ ಸಾಗಿದರು. ಸವಾಲುಗಳಿಗೆ, ಬದಲಾದ ಪರಿಸ್ಥಿತಿಗಳಿಗೆ ಎದೆಗುಂದದಿರುವ ಅವರ ‘ಪಕ್ಷನಿಷ್ಠೆಯ’ನ್ನು ಎದುರಾಳಿಗಳೂ ಮೆಚ್ಚಿಕೊಂಡಿದ್ದಿದೆ.