ಅಬಕಾರಿ ಅಧೀಕ್ಷಕ ಹುದ್ದೆ ನಿರಾಕರಿಸುತ್ತಿರುವ ಅಧಿಕಾರಿಗಳು!

ಡಿವೈಎಸ್‌ಇಗಳು ಕಳೆದ ಮೂರು ವರ್ಷಗಳಿಂದ ವಿವಿಧ ಕಾರಣ ನೀಡಿ ಬಡ್ತಿ ನಿರಾಕರಿಸುತ್ತಿದ್ದಾರೆ. ಅಬಕಾರಿ ಇಲಾಖೆ ಮತ್ತೊಮ್ಮೆ ಬಡ್ತಿ ಪ್ರಕ್ರಿಯೆ ಆರಂಭಿಸಲು ಅಧಿಸೂಚನೆ ಹೊರಡಿಸಿದೆ. ಇಲಾಖಾ ವಿಚಾರಣೆ, ಶಿಸ್ತುಕ್ರಮ ಬಾಕಿ ಇರುವವರನ್ನು ಹೊರತುಪಡಿಸಿ, ಸಕಾರಣವಿಲ್ಲದೇ ಬಡ್ತಿ ನಿರಾಕರಿಸುವವರ ವಿರುದ್ಧ ಶಿಸ್ತುಕ್ರಮ ಕೈಗೊಳ್ಳುವ ಎಚ್ಚರಿಕೆ ನೀಡಿದೆ.

ಇಲಾಖೆ ನೀಡಿದ್ದ ಬಡ್ತಿಯನ್ನು ಕೆಲ ವರ್ಷಗಳಿಂದ ಡಿವೈಎಸ್‌ಇಗಳು ನಿರಾಕರಿಸುತ್ತಾ ಬಂದಿರುವುದರಿಂದ 35 ಎಸ್‌ಪಿಇ ಸ್ಥಾನಗಳು ಖಾಲಿ ಉಳಿದಿದ್ದವು. ಅವುಗಳ ಜತೆಗೆ ಸ್ಥಳೀಯ ವೃಂದದ ಐದು ಸ್ಥಾನಗಳು ಸೇರಿ 39 ಹುದ್ದೆಗಳ ಭರ್ತಿಗಾಗಿ ರಾಜ್ಯಮಟ್ಟದ ಜ್ಯೇಷ್ಠತಾ ಪಟ್ಟಿಯನ್ನು ಬಿಡುಗಡೆ ಮಾಡಿರುವ ಇಲಾಖೆಯ ಆಯುಕ್ತರು, 2020ರ ನಂತರ ಬಡ್ತಿ ನಿರಾಕರಿಸಿದವರ ಪಟ್ಟಿಯನ್ನು ಪ್ರತ್ಯೇಕವಾಗಿ ‘ಪರ್ಫಾಮೆನ್ಸ್‌ ರಿಪೋರ್ಟಿಂಗ್ ಸಿಸ್ಟಂ’ನಲ್ಲಿ ಅಳವಡಿಸಲು ಸೂಚಿಸಿದ್ದಾರೆ.

ಡಿವೈಎಸ್‌ಇಗಳ ಮರ್ಜಿಯಲ್ಲಿ ಅಧೀಕ್ಷಕರು!

ಪ್ರತಿ ಅಬಕಾರಿ ಜಿಲ್ಲೆಯಲ್ಲೂ ‘ಎ’ ಗ್ರೂಪ್‌ನ ತಲಾ ಒಂದು ಉಪ ಆಯುಕ್ತ, ಅಧೀಕ್ಷಕರ ಹುದ್ದೆಗಳಿವೆ. ಉಪ ಆಯುಕ್ತರಿಗೆ ಇಲಾಖೆಯ ವಾಹನ, ಸಿಬ್ಬಂದಿ ಮೇಲೆ ಉಸ್ತುವಾರಿ, ಅಬಕಾರಿ ಪ್ರಕರಣಗಳ ಕಾರ್ಯಾಚರಣೆ, ತನಿಖೆಯ ಅಧಿಕಾರ ನೀಡಲಾಗಿದೆ. ಇದೇ ಅಧಿಕಾರವನ್ನು ಇಲಾಖೆಯ ಉಪ ಅಧೀಕ್ಷಕರು ತಮ್ಮ ಉಪ ವಲಯದ ವ್ಯಾಪ್ತಿಯಲ್ಲಿ ಹೊಂದಿದ್ದಾರೆ. ಆದರೆ, ಅಧೀಕ್ಷಕರಿಗೆ ಪ್ರಕರಣಗಳ ಸ್ವಯಂ ಕಾರ್ಯಾಚರಣೆ, ತನಿಖೆ ಕೈಗೊಳ್ಳುವ, ಅಧೀನ ಅಧಿಕಾರಿಗಳ ಮೇಲೆ ಹಿಡಿತ ಹೊಂದುವ ಯಾವ ಅಧಿಕಾರವೂ ಇಲ್ಲ. ವಿವಿಧ ಠಾಣೆಗಳಲ್ಲಿ ದಾಖಲಾಗುವ ಅಪರಾಧ ಪ್ರಕರಣಗಳನ್ನು ಪರಿಶೀಲಿಸಲು ಲಾಗಿನ್‌ ಆಗುವ ಅವಕಾಶವೂ ಅವರಿಗಿಲ್ಲ.

ಇಲಾಖೆಯ ವಾಹನ, ಚಾಲಕರ ಸೌಲಭ್ಯವೂ ಇಲ್ಲ. ಎಲ್ಲಾದರೂ ಹೋಗಬೇಕೆಂದರೆ ತಮ್ಮ ಜಿಲ್ಲಾ ವ್ಯಾಪ್ತಿಯಲ್ಲಿರುವ ಡಿವೈಎಸ್‌ಇಗಳಿಗೆ ಮನವಿ ಮಾಡಿಕೊಂಡು ಖಾಲಿ ಇದ್ದ ಸಮಯದಲ್ಲಿ ಅವರ ವಾಹನ ಪಡೆಯಬೇಕಿದೆ. ಅಧೀಕ್ಷಕರ ಸ್ಥಾನಕ್ಕೆ ಸರ್ಕಾರ ನಿರ್ದಿಷ್ಟ ಕಾರ್ಯಸೂಚಿಯನ್ನೂ ನಿಗದಿ ಮಾಡಿಲ್ಲ. ಇದರಿಂದ ಇಲಾಖೆಯ ಇತರೆ ಕಾರ್ಯಗಳಿಗೂ ಅವರು ಅಧೀನ ಅಧಿಕಾರಿಗಳನ್ನೇ ಅವಲಂಬಿಸಬೇಕಿದೆ.