ಹ್ಯೂಸ್ಟನ್‌: ವೈದ್ಯಕೀಯ ಹಗರಣದಲ್ಲಿಭಾಗಿಯಾದ ಆರೋಪದ ಮೇರೆಗೆ ಭಾರತೀಯ ಮೂಲದ ಅಮೆರಿಕದ ವೃತ್ತಿಪರ ಶುಶ್ರೂಷಕನಿಗೆ (ನರ್ಸ್‌ ಪ್ರಾಕ್ಟಿಷನರ್‌) ಅಮೆರಿಕದ ನ್ಯಾಯಾಲಯವು 20 ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ ಹಾಗೂ ವಂಚನೆಯ 52 ದಶಲಕ್ಷ ಡಾಲರ್‌ ಅನ್ನು ದಂಡ ರೂಪದಲ್ಲಿ ನೀಡಲು ಸೂಚಿಸಿದೆ.
ತ್ರಿವಿಕ್ರಮ ರೆಡ್ಡಿ (39)ಎಂಬಾತನ ವಿರುದ್ಧ ವೈದ್ಯಕೀಯ ಮತ್ತು ಖಾಸಗಿ ವಿಮೆ ಹಗರಣದಲ್ಲಿ ಭಾಗಿಯಾಗಿರುವ ಆರೋಪ ಕೇಳಿಬಂದಿತ್ತು. ಇದೀಗ ಈ ಆರೋಪಗಳು ಸಾಬೀತಾಗಿದ್ದು, ಮೇ 25ರಂದು ನ್ಯಾಯಾಲಯವು ಈ ಶಿಕ್ಷೆ ವಿಧಿಸಿದೆ’ ಎಂದು ಉತ್ತರ ಟೆಕ್ಸಾಸ್‌ನ ಜಿಲ್ಲಾ ನ್ಯಾಯಾಲಯದ ಹಂಗಾಮಿ ಅಟಾರ್ನಿ ಪ್ರೇರಕ್‌ ಷಾ ತಿಳಿಸಿದರು.
‘ಮೆಡಿಕೇರ್‌, ಬ್ಲೂ ಕ್ರಾಸ್‌ ಬ್ಲೂ ಶೀಲ್ಡ್‌ ಆಫ್‌ ಟೆಕ್ಸಾಸ್‌, ಏಟ್ನಾ, ಯುನೈಟೆಡ್ ಹೆಲ್ತ್‌ಕೇರ್, ಹುಮಾನಾ ಮತ್ತು ಸಿಗ್ನಾವನ್ನು ವಂಚಿಸಲು ತ್ರಿವಿಕ್ರಮ ರೆಡ್ಡಿ ಯೋಜನೆ ರೂಪಿಸಿದ್ದ’ ಎಂದು ನ್ಯಾಯಾಲಯದ ದಾಖಲೆಗಳು ಹೇಳಿವೆ.
