ಕಡ್ಡಾಯ ಮರಣದಂಡನೆ ರದ್ದು ಮಾಡಿದ ಮಲೇಷ್ಯಾ ಸರ್ಕಾರ

ಈ ನಿರ್ಣಯದಿಂದಾಗಿ ಸುಮಾರು 1,300 ಕೈದಿಗಳು ಮರಣದಂಡನೆಯಿಂದ ರಿಲೀಫ್ ಪಡೆಯಲಿದ್ದಾರೆ ಎಂದು ವರದಿ ತಿಳಿಸಿದೆ.

2018ರಲ್ಲಿ ಗರಿಷ್ಠ ಶಿಕ್ಷೆಯನ್ನು ರದ್ದು ಮಾಡುವುದಾಗಿ ಸರ್ಕಾರ ಭರವಸೆ ನೀಡಿದ್ದರಿಂದ ಅಂದಿನಿಂದಲೂ ಯಾರಿಗೂ ಮರಣದಂಡನೆ ಶಿಕ್ಷೆ ವಿಧಿಸಲಾಗಿರಲಿಲ್ಲ.

ವರ್ಷದ ಬಳಿಕ ವಿವಿಧ ಪಕ್ಷಗಳ ಒತ್ತಡಕ್ಕೆ ಮಣಿದು ಮರಣದಂಡನೆ ರದ್ದು ಮಾಡುವ ನಿರ್ಧಾರದಿಂದ ಹಿಂದೆ ಸರಿದಿತ್ತು. ನ್ಯಾಯಾಲಯಗಳು ವಿವೇಚನೆ ಬಳಸಿ ಮರಣದಂಡನೆ ಬದಲು ಇತರೆ ಶಿಕ್ಷೆ ವಿಧಿಸಬಹುದು ಎಂದು ಅದು ಹೇಳಿತ್ತು.

ಇದೀಗ, ಈ ಹೊಸ ಮಸೂದೆ ಮಂಡಿಸಿದ್ದು, ಗಂಭೀರ ಅಪರಾಧಗಳಲ್ಲಿ ಮರಣದಂಡನೆ ಬದಲಿಗೆ ಮರಣ ದಂಡನೆಗೆ ಬದಲಾಗಿ ಚಾಟಿಯಲ್ಲಿ ಥಳಿಸುವುದು, 30–40 ವರ್ಷ ಜೈಲು ಶಿಕ್ಷೆ ವಿಧಿಸುವ ಪ್ರಸ್ತಾವನೆ ಇದೆ. ಈ ಹೊಸ ಕಾನೂನು ಈ ಹಿಂದಿನ ಜೀವಾವಧಿ ಜೈಲು ಶಿಕ್ಷೆಗೂ ಪರ್ಯಾಯವಾಗಿರಲಿದೆ.

ದಕ್ಷಿಣ ಏಷ್ಯಾದ ಕೆಲ ರಾಷ್ಟ್ರಗಳು ಗಂಭೀರ ಅಪರಾಧಗಳಿಗೆ ಮರಣದಂಡನೆ ವಿಧಿಸುವ ನಿರ್ಧಾರಕ್ಕೆ ಬಂದಿರುವ ಈ ಸಂದರ್ಭದಲ್ಲೇ ಮಲೇಷ್ಯಾ ಅದರಿಂದ ಹಿಂದೆ ಸರಿದಿದೆ.

ಕಳೆದ ವರ್ಷ ಮಾದಕ ದ್ರವ್ಯ ಅಪರಾಧಗಳಿಗೆ ಸಂಬಂಧಿಸಿದಂತೆ ಸಿಂಗಪುರದಲ್ಲಿ 11 ಅಪರಾಧಿಗಳನ್ನು ನೇಣಿಗೇರಿಸಲಾಗಿತ್ತು. ಮ್ಯಾನ್ಮಾರ್‌ನಲ್ಲೂ ಸಹ ಮಿಲಿಟರಿ ಆಡಳಿತ ವಿರುದ್ಧದ ನಾಲ್ವರು ಹೋರಾಟಗಾರರನ್ನು ಗರಿಷ್ಠ ಶಿಕ್ಷೆಗೆ ಒಳಪಡಿಸಲಾಗಿತ್ತು.