ಜೆರುಸಲೇಂ (ಎ.ಪಿ): ಯಮೆನ್‌ನ ಹುತಿ ಬಂಡುಕೋರರು ಪ್ರಯೋಗಿಸಿದ್ದ ಹಡಗು ನಿರೋಧಕ ಕ್ಷಿಪಣಿಯನ್ನು ಅಮೆರಿಕದ ನೌಕಾಪಡೆಯ ಧ್ವಂಸಕವು ನಾಶಪಡಿಸಿದೆ. ಇದು, ಅಮೆರಿಕದ ಪಡೆಯನ್ನು ಗುರಿಯಾಗಿಸಿ ನಡೆದ ಹೊಸ ದಾಳಿಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಯುಎಸ್‌ಎಸ್‌ ಗ್ರೇವೆಲೆ ಹೆಸರಿನ ಕ್ಷಿಪಣಿ ಧ್ವಂಸಕವನ್ನೇ ಗುರಿಯಾಗಿಸಿ ಮಂಗಳವಾರ ರಾತ್ರಿ ಹುತಿ ಬಂಡುಕೋರರು ಈ ಕ್ಷಿಪಣಿ ಪ್ರಯೋಗಿಸಿದ್ದರು. ಯಾವುದೇ ರೀತಿ ಹಾನಿ ಸಂಭವಿಸಿಲ್ಲ ಎಂದು ಅಮೆರಿಕ ಸೇನೆಯ ಕೇಂದ್ರೀಯ ಕಮಾಂಡ್‌ನ ಹೇಳಿಕೆ ತಿಳಿಸಿದೆ.
ಹುತಿ ಸೇನೆಯ ವಕ್ತಾರ ಬ್ರಿಗೇಡಿಯರ್ ಜನರಲ್ ಯಾಹ್ಯಾ ಸರೀ ಅವರು, ‘ಈ ದಾಳಿಯನ್ನೇ ಹುತಿ ಸೇನೆ ನಡೆಸಿದ್ದು, ಇದು ಅಮೆರಿಕ–ಬ್ರಿಟಿಷ್‌ ಅತಿಕ್ರಮಣಕ್ಕೆ ಪ್ರತಿರೋಧ ಕ್ರಮವಾಗಿದೆ ಎಂದು ಹೇಳಿದ್ದಾರೆ.
