ಶನಿವಾರ, ಮೇ 30, 2020
27 °C

ಭೂಲೋಕದಲ್ಲಿ ಯಮ!

ಬಿ.ಎನ್.ಮಲ್ಲೇಶ್ Updated:

ಅಕ್ಷರ ಗಾತ್ರ : | |

Prajavani

ಏನಿದು ವಿಚಿತ್ರ! ಎರಡು ತಿಂಗಳಿಂದ ಭೂಲೋಕದಲ್ಲಿ ಸಾಯುವವರ ಸಂಖ್ಯೆಯಲ್ಲಿ ದಿಢೀರ್ ಇಳಿಕೆಯಾಗಿದೆ. ಯಮಲೋಕದಲ್ಲಿ ವಹಿವಾಟೇ ಇಲ್ಲದಂತಾಗಿದೆಯಲ್ಲ ಎಂದು ಯಮನಿಗೆ ಚಿಂತೆಯಾಯಿತು. ವಿಧಿಲಿಖಿತದ ಪ್ರಕಾರ ಅಪಘಾತಗಳಲ್ಲಿ ಸಾಯಬೇಕಾದವರು, ಆತ್ಮಹತ್ಯೆಗೆ ಫಿಕ್ಸ್ ಆಗಿದ್ದವರು, ಹೊಡೆದಾಟದಲ್ಲಿ ಕೊಲೆಯಾಗಬೇಕಾದವರು ಯಾರೂ ಸಾಯುತ್ತಿಲ್ಲ...

ಏನ್ ನಡೀತಿದೆ ಕರ್ನಾಟಕದಲ್ಲಿ ನೋಡಿಯೇಬಿಡಬೇಕು ಎಂದು ನಿರ್ಧರಿಸಿದ ಯಮ, ಸೀದಾ ಬೆಂಗಳೂರಿನ ಮೆಜೆಸ್ಟಿಕ್‍ಗೆ ಬಂದಿಳಿದ. ನೋಡುತ್ತಾನೆ, ಬಸ್‍ಸ್ಟ್ಯಾಂಡಲ್ಲಿ ಬಸ್ಸೂ ಇಲ್ಲ, ಜನರೂ ಇಲ್ಲ. ಅತ್ತ ರೈಲುಗಳೂ ಇಲ್ಲ, ಲಾರಿಗಳೂ ಇಲ್ಲ. ಮತ್ತೆ ಅಪಘಾತಗಳಾಗಲು ಹೇಗೆ ಸಾಧ್ಯ? ಜನರೇ ಇಲ್ಲದಿದ್ದ ಮೇಲೆ ಹೊಡೆದಾಟ, ಕೊಲೆಗಳಾಗಲು ಹೇಗೆ ಸಾಧ್ಯ?

ಯಮನಿಗೆ ಆಶ್ಚರ್ಯವಾಯಿತು. ಏನಿದು ಭೂಲೋಕದ ವ್ಯವಹಾರವೇ ಬದಲಾಗಿ ಹೋಯಿತೆ? ರಸ್ತೆಗಳಲ್ಲಿ ಕಂಡವರೆಲ್ಲ ಮುಖ ಮುಚ್ಚಿಕೊಂಡು ಓಡಾಡುತ್ತಿದ್ದಾರೆ. ವ್ಯಾಪಾರ, ವಹಿವಾಟೆಲ್ಲ ನಿಂತು ಹೋಗಿದೆ. ಆಂಬುಲೆನ್ಸ್, ಪೊಲೀಸ್ ವಾಹನ ಮಾತ್ರ ಓಡಾಡುತ್ತಿವೆ. ಏನಿದು ವಿಚಿತ್ರ? ಇದರ ಬಗ್ಗೆ ಯಾರನ್ನ ಕೇಳಲಿ ಎಂದು ಯೋಚಿಸುತ್ತಿದ್ದಾಗ, ಪೊಲೀಸ್ ಪೇದೆಯೊಬ್ಬ ಬಂದು ಯಮನನ್ನು ಲಾಠಿಯಿಂದ ತಿವಿದ. ‘ಯಾರ‍್ರೀ ನೀವು? ಎಲ್ಲಿಗೆ ಹೋಗ್ತಾ ಇದ್ದೀರಿ? ಪಾಸ್ ಇದೆಯಾ?’

ಯಮನಿಗೆ ಗಾಬರಿಯಾಯಿತು. ‘ಪಾಸಾ? ನನ್ನ ಬಳಿ ‘ಪಾಶ’ವಿದೆ...’

‘ಏನು? ಪಾಶನಾ? ನಿನ್ ತಲೆ. ಅದಿರ‍್ಲಿ, ಮಾಸ್ಕ್ ಯಾಕೆ ಹಾಕಿಲ್ಲ? ಏನು ಆಟ ಆಡ್ತಿದೀಯಾ? ಬೇಕಾ ಏಟು? ನಿಂಗೆ ಐವತ್ತು ಬಸ್ಕಿ ಹೊಡಿಯೋ ಶಿಕ್ಷೆ ಕೊಡ್ತಿದೀನಿ...’ ಪೇದೆ ಗರಂ ಆದ.

ಯಮ ಪಿಟಿಕ್ಕೆನ್ನದೆ ಬಸ್ಕಿ ಹೊಡೆಯಲು ಆರಂಭಿಸಿ, ಮನಸ್ಸಿನಲ್ಲೇ ‘ಲೇ ನರಮಾನವ, ನೀನು ಸತ್ತು ಯಮಲೋಕಕ್ಕೆ ಬಾರಲೆ, ನಿನ್ನ ಕರಕರ ಕತ್ತರಿಸಿ, ಕೊತ ಕೊತ ಎಣ್ಣೆಗೆ ಹಾಕದಿದ್ರೆ ನಾನು ಯಮನೇ ಅಲ್ಲ’ ಎಂದು ಹಲ್ಲು ಕಡಿದ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.