ಚೆನ್ನೈ: ಅಕ್ರಮ ಆಸ್ತಿ ಪ್ರಕರಣದಲ್ಲಿ ಜೈಲಿನಲ್ಲಿರುವ ತಮಿಳುನಾಡು ಎಐಡಿಎಂಕೆ ಪಕ್ಷದ ನಾಯಕಿ ವಿ.ಕೆ ಶಶಿಕಲಾ ಪತಿ ಎಮ್‌. ನಟರಾಜನ್‌ ಅವರು ತೀವ್ರ ಎದೆನೋವಿನ ಕಾರಣ ಆಸ್ಪತ್ರೆಗೆ ದಾಖಲಾಗಿದ್ದು, ಪರಿಸ್ಥಿತಿ ಗಂಭೀರವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
74 ವರ್ಷದ ನಟರಾಜನ್‌ ಅವರನ್ನು ಗ್ಲೆನೀಗಲ್ಸ್‌ ಆಸ್ಪತ್ರೆಗೆ ದಾಖಲಿಸಲಾಗಿದೆ.
‘ತೀವ್ರ ಎದೆ ನೋವಿನ ಕಾರಣ ಮಾರ್ಚ್ 16ರಂದು ಗ್ಲೆನೀಗಲ್ಸ್‌ ಆಸ್ಪತ್ರೆಗೆ ದಾಖಲಾಗಿದ್ದು, ಅವರನ್ನು ತೀವ್ರ ನಿಗಾ ಘಟಕದಲ್ಲಿ ಇರಿಸಲಾಗಿದೆ’ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.
‘ಸದ್ಯ ನಟರಾಜನ್‌ ಅವರಿಗೆ ವೆಂಟಿಲೇಟರ್‌ ಅಳವಡಿಸಲಾಗಿದ್ದು, ಪರಿಸ್ಥಿತಿ ಗಂಭೀರವಾಗಿದೆ’ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿ ಷಣ್ಮುಗ ಪ್ರಿಯನ್‌ ಹೇಳಿದ್ದಾರೆ.
ನಟರಾಜನ್‌ ಅವರು ಕಳೆದ ಅಕ್ಟೋಬರ್‌ನಲ್ಲಿ ಲಿವರ್‌(ಯಕೃತ್ತು) ಹಾಗೂ ಕಿಡ್ನಿ(ಮೂತ್ರಪಿಂಡ) ಕಸಿ ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಅಕ್ರಮ ಆಸ್ತಿ ಗಳಿಕೆ ಪ್ರಕರಣದಲ್ಲಿ ಬೆಂಗಳೂರು ಜೈಲಿನಲ್ಲಿರುವ ಶಶಿಕಲಾ ಆಗ ನ್ಯಾಯಾಲಯದ ಅನುಮತಿ ಕೋರಿ, ಪರೋಲ್‌ ಪಡೆದು ಪತಿಯನ್ನು ಭೇಟಿ ಮಾಡಿದ್ದರು.
