ಸಂಪಾದಕೀಯ | ಲ್ಯಾಟರಲ್ ಎಂಟ್ರಿ ರದ್ದು: ಕೇಂದ್ರದ ತೀರ್ಮಾನ ಸ್ವಾಗತಾರ್ಹ

ಲ್ಯಾಟರಲ್ ಎಂಟ್ರಿ ವಿಚಾರವಾಗಿ ಸರ್ಕಾರ ಕೈಗೊಂಡಿದ್ದ ತೀರ್ಮಾನವು ಮೀಸಲಾತಿಯ ನಿಯಮಗಳನ್ನು ಉಲ್ಲಂಘಿಸಿತ್ತು. ಈ ವಿಚಾರವಾಗಿ ವ್ಯಕ್ತವಾಗಿದ್ದ ಕಳವಳಗಳಿಗೆ ಸಮರ್ಥನೆ ಇತ್ತು. ಈ ಹಿಂದೆ ಮನಮೋಹನ್ ಸಿಂಗ್ ಅವರನ್ನೋ ನಂದನ್ ನಿಲೇಕಣಿ ಅವರನ್ನೋ ಮಹತ್ವದ ಹುದ್ದೆಗಳಿಗೆ ನೇಮಕ ಮಾಡಿದಂತೆ ಇದು ಬಹಳ ಅಪರೂಪದ ನೇಮಕಾತಿ ಆಗಿರಲಿಲ್ಲ. ಹಲವರನ್ನು ಅಧಿಕಾರಿಶಾಹಿಗೆ ನೇಮಕ ಮಾಡುವ ಸಂದರ್ಭದಲ್ಲಿ ಕೇಂದ್ರ ಸರ್ಕಾರವು ಮೀಸಲಾತಿಯ ನೀತಿಯನ್ನು ಉಲ್ಲಂಘಿಸಬಾರದಿತ್ತು. ನಿರ್ದಿಷ್ಟ ಹುದ್ದೆಗಳಿಗೆ, ನಿರ್ದಿಷ್ಟ ಅವಧಿಗೆ ತಜ್ಞರನ್ನು, ನಾಯಕತ್ವದ ಗುಣಗಳು ಇರುವವರನ್ನು ನೇಮಕ ಮಾಡುವುದು ತನ್ನ ಉದ್ದೇಶ ಎಂದು ಕೇಂದ್ರವು ಹೇಳಿತ್ತು. ಇದರಿಂದಾಗಿ ಅಧಿಕಾರಿಶಾಹಿ ವ್ಯವಸ್ಥೆಯಲ್ಲಿ ಹೊಸತನ ಬರುತ್ತದೆ, ಹೊಸ ಆಲೋಚನೆಗಳಿಗೆ ಅಲ್ಲಿ ಅವಕಾಶ ಸಿಗುತ್ತದೆ ಎಂದು ಹೇಳಲಾಗಿತ್ತು. ಆದರೆ ಈ ರೀತಿಯ ನೇಮಕಾತಿಗಳು ನಡೆಯುವಾಗ ತಮಗೆ ಹತ್ತಿರದವರನ್ನೇ ನೇಮಿಸುವ, ಪಾರದರ್ಶಕತೆ ಇಲ್ಲವಾಗುವ ಸಾಧ್ಯತೆಗಳೂ ಇರುತ್ತವೆ. ಲ್ಯಾಟರಲ್ ಎಂಟ್ರಿ ಪ್ರಸ್ತಾವಕ್ಕೆ ವಿರೋಧ ದಾಖಲಿಸಲು ಇದು ಕೂಡ ಒಂದು ಸಮರ್ಥನೀಯ ಕಾರಣ ಆಗಬಲ್ಲದು.

ಖಾಸಗಿ ವಲಯದಿಂದ ನೇಮಕ ಮಾಡಿದ ವ್ಯಕ್ತಿಗಳಿಗೆ ಅವರದ್ದೇ ಆದ ಅನುಭವಗಳು ಇರುತ್ತವೆ. ಆ ಅನುಭವಗಳೇ ಅವರ ನಡೆ, ನುಡಿಯ ಮೇಲೆ ಪ್ರಭಾವ ಬೀರುತ್ತಿರುತ್ತವೆ. ಹೀಗೆ ನೇಮಕ ಆದವರು ಜಂಟಿ ಕಾರ್ಯದರ್ಶಿ ಮಟ್ಟದಲ್ಲಿ ನೀತಿ ನಿರೂಪಣೆಯ ಕೆಲಸ ಮಾಡಬಹುದಿತ್ತು. ಈ ನೇಮಕಾತಿಗಳಲ್ಲಿ ರಾಜಕೀಯವು ಪ್ರಭಾವ ಬೀರುವ ಅಪಾಯವೂ ಇತ್ತು. ಸರ್ಕಾರದ ಹಲವು ಹಂತಗಳಲ್ಲಿ ಆಗುವ ತೀರ್ಮಾನಗಳ ಮೇಲೆ ರಾಜಕೀಯ ಪ್ರಭಾವ ಕೆಲಸ ಮಾಡುವುದು ಹೊಸದೇನೂ ಅಲ್ಲ. ಬಿಜೆಪಿಯ ಸೈದ್ಧಾಂತಿಕ ಮಾತೃ ಸಂಘಟನೆಯಾದ ಆರ್‌ಎಸ್‌ಎಸ್‌ ಚಟುವಟಿಕೆಗಳಲ್ಲಿ ಸರ್ಕಾರಿ ನೌಕರರು ಭಾಗಿಯಾಗಲು ಇದ್ದ ನಿರ್ಬಂಧವನ್ನು ತೆಗೆದುಹಾಕಿದ ಕೆಲವೇ ದಿನಗಳಲ್ಲಿ ಈ ಜಾಹೀರಾತು ಪ್ರಕಟವಾಗಿತ್ತು. ಆಡಳಿತ ವ್ಯವಸ್ಥೆಯಲ್ಲಿ ಇರುವ ಕೆಲವು ಪಿಡುಗುಗಳನ್ನು, ಕಾಯಿಲೆಗಳನ್ನು ನಿವಾರಿಸಲು ಲ್ಯಾಟರಲ್ ಎಂಟ್ರಿ ವ್ಯವಸ್ಥೆಯು ಮದ್ದು ಎಂದು ಹೇಳಲು ಆಗದು. ಪ್ರತಿಭೆಗೆ ಅವಕಾಶ ಒದಗಿಸುವುದು ಹಾಗೂ ಸಾಮಾಜಿಕ ನ್ಯಾಯವನ್ನು ಖಾತರಿಪಡಿಸುವುದು ಒಂದಕ್ಕೊಂದು ಸಂಬಂಧ ಇಲ್ಲದ ಸಂಗತಿಗಳು ಎಂದು ಪರಿಗಣಿಸಲು ಅವಕಾಶ ಇಲ್ಲ. ಕೇಂದ್ರ ಲೋಕಸೇವಾ ಆಯೋಗವು ತನ್ನ ನೇಮಕಾತಿ ನಿಯಮಗಳನ್ನು ಪಾಲಿಸುತ್ತಲೇ, ತಜ್ಞರನ್ನು ನೇಮಕ ಮಾಡಿದ ಅನುಭವ ಹೊಂದಿದೆ. ಸರ್ಕಾರ ಈಗ ಹಿಂದಕ್ಕೆ ಹೆಜ್ಜೆ ಇರಿಸಿರುವುದು ಅದು ದುರ್ಬಲವಾಗಿದೆ ಎಂಬುದನ್ನೂ ತೋರಿಸುತ್ತಿದೆ. ಈಗ ಸರ್ಕಾರವು ಎನ್‌ಡಿಎ ಮೈತ್ರಿಕೂಟದಲ್ಲಿನ ಇತರ ರಾಜಕೀಯ ಪಕ್ಷಗಳ ಮಾತಿಗೆ ಕಿವಿಗೊಡಬೇಕಿದೆ ಹಾಗೂ ವಿರೋಧ ಪಕ್ಷಗಳ ಧ್ವನಿಗೂ ಬೆಲೆ ಕೊಡಬೇಕಿದೆ. ನಿರ್ಣಯಗಳನ್ನು ಕೈಗೊಳ್ಳುವ ಪ್ರಕ್ರಿಯೆಯು ಪ್ರಜಾತಾಂತ್ರಿಕವಾಗಿ ಇರುವಂತೆ ನೋಡಿಕೊಳ್ಳುವ ದೃಷ್ಟಿಯಿಂದ ಇದು ಒಳ್ಳೆಯದೇ.