Editorial | ಕಂಪ್ಯೂಟರ್ ಆಮದಿಗೆ ನಿರ್ಬಂಧ: ಸದುದ್ದೇಶವಿದ್ದರೂ ಸ್ಪಷ್ಟತೆ ಬೇಕು

ಭಾರತಕ್ಕೆ ಆಮದಾಗುವ ಲ್ಯಾಪ್‌ಟಾಪ್, ಪರ್ಸನಲ್ ಕಂಪ್ಯೂಟರ್, ಟ್ಯಾಬ್‌ಗಳಲ್ಲಿ ಚೀನಾ ಮೂಲದವು ಹೆಚ್ಚು ಎಂದು ವರದಿಗಳು ಹೇಳುತ್ತವೆ. ಆದರೆ, ಕೇಂದ್ರ ಸರ್ಕಾರವು ಆಮದು ನಿರ್ಬಂಧ ಜಾರಿಗೆ ತಂದಿರುವುದು ಯಾವುದೇ ದೇಶವನ್ನು ನಿರ್ದಿಷ್ಟವಾಗಿ ಗುರಿಯಾಗಿಸಿಕೊಂಡಿಲ್ಲ. ಈ ನಿರ್ಬಂಧವು ಎಲ್ಲ ದೇಶಗಳಿಗೂ ಸಮಾನವಾಗಿ ಅನ್ವಯವಾಗುತ್ತದೆ. ವಾಸ್ತವದಲ್ಲಿ, ನಿರ್ಬಂಧಗಳ ಜಾರಿಯ ಹಿಂದೆ ಇನ್ನೂ ಒಂದು ಮಹತ್ವದ ಕಾರಣ ಇದೆ. ‘ನಮ್ಮ ಪ್ರಜೆಗಳ ಭದ್ರತೆಯನ್ನು ಖಾತರಿಪಡಿಸುವುದು ಪ್ರಮುಖ ಕಾರಣ’ ಎಂದು ಅಧಿಕಾರಿಯೊಬ್ಬರು ತಿಳಿಸಿರುವುದಾಗಿ ವರದಿಯಾಗಿದೆ.

‘ಕೆಲವು ಹಾರ್ಡ್‌ವೇರ್‌ಗಳಲ್ಲಿ ಭದ್ರತೆಗೆ ಸಂಬಂಧಿಸಿದ ಲೋಪಗಳು ಇರಬಹುದು. ಅವು ಸೂಕ್ಷ್ಮ ಮಾಹಿತಿಯನ್ನು, ವೈಯಕ್ತಿಕ ಮಾಹಿತಿಯನ್ನು ಸೋರಿಕೆ ಮಾಡಬಹುದು. ಸುರಕ್ಷತೆಯು ನಮ್ಮ ಅತಿಮುಖ್ಯ ಆದ್ಯತೆ’ ಎಂದು ಕೂಡ ಈ ಅಧಿಕಾರಿ ಹೇಳಿದ್ದಾರೆ. ಆದರೆ, ಮಹಾನಿರ್ದೇಶನಾಲಯದ ಅಧಿಸೂಚನೆಯಲ್ಲಿ ಈ ಅಂಶದ ಪ್ರಸ್ತಾಪ ಇಲ್ಲ. ದೇಶದ ಜನರ ವೈಯಕ್ತಿಕ ಮಾಹಿತಿಯ ಭದ್ರತೆಯ ದೃಷ್ಟಿಯಿಂದ ಆಮದು ನಿರ್ಬಂಧ ಜಾರಿಗೆ ತಂದಿರುವುದು ನಿಜವೇ ಆಗಿದ್ದರೆ ಅದು ಸೂಕ್ತ ಕ್ರಮ ಆಗಬಹುದು. ಆದರೆ ಈ ಕುರಿತು ಸ್ಪಷ್ಟತೆ ಬೇಕು. 

ಭದ್ರತೆಯ ಕಾರಣಗಳನ್ನು ನೀಡಿರುವುದು ಜನರಲ್ಲಿ ಆತಂಕ ಮೂಡಿಸಬಲ್ಲದು ಕೂಡ. ಹತ್ತು ಹಲವು ಕಂಪನಿಗಳ, ಹತ್ತು ಹಲವು ಮಾದರಿಗಳ ಲ್ಯಾಪ್‌ಟಾಪ್‌, ಕಂಪ್ಯೂಟರ್‌, ಟ್ಯಾಬ್‌ಗಳನ್ನು ವೈಯಕ್ತಿಕ ಬಳಕೆಗೆ, ನೌಕರಿಯ ಅಗತ್ಯಗಳಿಗೆ ಜನ ಬಳಕೆ ಮಾಡುತ್ತಿದ್ದಾರೆ. ಅದರಲ್ಲಿ ಅವರು ತೀರಾ ಖಾಸಗಿಯಾದ ವಿವರಗಳನ್ನು ಸಂಗ್ರಹಿಸಿ ಇಟ್ಟುಕೊಂಡಿರಬಹುದು. ಯಾವ ಹಾರ್ಡ್‌ವೇರ್‌ನಲ್ಲಿ ಭದ್ರತೆಗೆ ಸಂಬಂಧಿಸಿದ ಲೋಪಗಳು ಕಾಣಿಸಿಕೊಂಡಿವೆ ಎಂಬುದನ್ನು ಸ್ಪಷ್ಟವಾಗಿ ತಿಳಿಸಿದರೆ, ತಾವು ತೆಗೆದುಕೊಳ್ಳಬೇಕಾದ ಸುರಕ್ಷತಾ ಕ್ರಮಗಳು ಯಾವುವು ಎಂಬುದನ್ನು ಜನರು ನಿರ್ಧರಿಸಬಹುದು.

ಸೈಬರ್ ಭದ್ರತೆಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರದ್ದೇ ಆದ ಪ್ರತ್ಯೇಕ ವಿಭಾಗ ಇದೆ. ಆ ವಿಭಾಗದ ನೆರವು ಪಡೆದು ಅಥವಾ ಇನ್ಯಾವುದೇ ಪರಿಣತ ಸಂಸ್ಥೆಯ ನೆರವು ಪಡೆದು, ಭದ್ರತೆಗೆ ಸಂಬಂಧಿಸಿದ ಲೋಪಗಳ ಬಗ್ಗೆ ಹಾಗೂ ಮುನ್ನೆಚ್ಚರಿಕೆಯ ಕ್ರಮಗಳ ಬಗ್ಗೆ ಮಾಹಿತಿ ನೀಡಬೇಕಾದುದು ಅಗತ್ಯ. ಇಂತಹ ಅಗತ್ಯ ಮಾಹಿತಿಗಳನ್ನು ನೀಡದೆ ಇದ್ದಲ್ಲಿ, ‘ಮಾಹಿತಿಯ ಭದ್ರತೆ, ಗೋಪ್ಯತೆ’ ಎಂಬ ಪದಗಳು ಜನರಲ್ಲಿ ಆತಂಕವನ್ನಷ್ಟೇ ಮೂಡಿಸಬಲ್ಲವು. ಆಮದು ನಿರ್ಬಂಧದ ಪರಿಣಾಮವು ಮಾರುಕಟ್ಟೆಯಲ್ಲಿ ಇನ್ನಷ್ಟೇ ಕಾಣಿಸಿಕೊಳ್ಳಬೇಕಿದೆ. ಇಂಟರ್ನೆಟ್ ಹಾಗೂ ಕಂಪ್ಯೂಟರ್‌ಗಳು ದೇಶದ ಸೇವಾ ಮತ್ತು ತಯಾರಿಕಾ ವಲಯದ ಪಾಲಿಗೆ ಬೆನ್ನೆಲುಬು ಇದ್ದಂತೆ. ಈ ಉಪಕರಣಗಳ ಕೊರತೆ ಎದುರಾದರೆ ಈ ವಲಯಗಳು ಸೊರಗುತ್ತವೆ. ಹಾಗಾಗದಂತೆಯೂ ಅತೀವ ಕಾಳಜಿ ವಹಿಸಬೇಕು.