ಸಂಪಾದಕೀಯ | ಉಗ್ರರಿಂದ ದಾಳಿ ಸಂಚು: ವಿಶ್ವಸಂಸ್ಥೆ ವರದಿ ಗಂಭೀರವಾಗಿ ಪರಿಗಣಿಸಿ

‘ಉಗ್ರರ ಕೃತ್ಯಗಳಿಗೆ ರಾಜ್ಯದಲ್ಲಿ ಆಸ್ಪದ ನೀಡುವುದಿಲ್ಲ, ಅವರನ್ನು ಮಟ್ಟಹಾಕಲು ನಮ್ಮ ಪೊಲೀಸರು ಕಾರ್ಯನಿರತರಾಗಿದ್ದಾರೆ’ ಎಂದು ರಾಜ್ಯದ ಗೃಹ ಸಚಿವರು ವಿಶ್ವಸಂಸ್ಥೆಯ ವರದಿಗೆ ಪ್ರತಿಕ್ರಿಯಿಸಿದ್ದಾರೆ. ಭಯೋತ್ಪಾದನೆಗೆ ಸದಾ ಹಾತೊರೆಯುವ ಉಗ್ರರ ವಿಷಯದಲ್ಲಿ ಎಷ್ಟು ಕಟ್ಟೆಚ್ಚರ ವಹಿಸಿದರೂ ಸಾಲದು ಎಂಬುದನ್ನು ಈ ಹಿಂದಿನ ಅನೇಕ ಹಿಂಸಾಕೃತ್ಯಗಳು ನಮಗೆ ತೋರಿಸಿಕೊಟ್ಟಿವೆ. ರಾಜ್ಯದ ಸಂಪೂರ್ಣ ಆಡಳಿತಯಂತ್ರವು ಕೊರೊನಾ ಸೋಂಕು ನಿವಾರಣೆಯತ್ತಲೇ ಗಮನ ಕೇಂದ್ರೀಕರಿಸಿದೆ. ಅದರಲ್ಲೂ ಪೊಲೀಸ್‌ ಇಲಾಖೆಯು ಅನವರತ ದುಡಿಯುತ್ತಿದೆ. ಅದು ಈ ಹೊತ್ತಿನ ಅಗತ್ಯ ಕೂಡ. ಕೆಲವು ಪೊಲೀಸರು ಕೋವಿಡ್‌ಪೀಡಿತರಾಗಿದ್ದು, 50 ವರ್ಷ ಮೇಲ್ಪಟ್ಟವರನ್ನು ರಜೆ ಮೇಲೆ ಕಳುಹಿಸಿರುವ ಇಲಾಖೆಯು ಸಿಬ್ಬಂದಿ ಕೊರತೆಯನ್ನು ಎದುರಿಸುತ್ತಿದೆ. ಇಂತಹ ಕಾರಣಗಳು ಏನೇ ಇದ್ದರೂ ಇವೇ ಈ ಹೊತ್ತಿನ ನಮ್ಮ ದೌರ್ಬಲ್ಯವಾಗದಂತೆ ನೋಡಿಕೊಳ್ಳಬೇಕಾದ ಮಹತ್ವದ ಹೊಣೆಗಾರಿಕೆಯು ಸರ್ಕಾರದ ಮುಂದೆ ಇದೆ. ಪ್ರಾರ್ಥನಾ ಮಂದಿರಗಳ ಮೇಲೆ ಉಗ್ರರ ದಾಳಿ ನಡೆಯುವ ಸಾಧ್ಯತೆ ಇದೆ ಎಂಬ ಗುಪ್ತಚರ ವರದಿಯನ್ನು ಶ್ರೀಲಂಕಾ ಸರ್ಕಾರ ಕಳೆದ ವರ್ಷ ಗಂಭೀರವಾಗಿ ಪರಿಗಣಿಸದೇ ಇದ್ದುದರಿಂದ, ಸರಣಿ ಬಾಂಬ್‌ ದಾಳಿಗಳಿಂದ ನೂರಾರು ಜನ ಪ್ರಾಣ ಕಳೆದುಕೊಂಡಿದ್ದರು. ನಾವು ಎಚ್ಚೆತ್ತುಕೊಳ್ಳಲು ಇದಕ್ಕಿಂತ ಬೇರೆ ಉದಾಹರಣೆ ಬೇಕಿಲ್ಲ. ಸಂಘಟಿತ ನೆಲೆಯಲ್ಲಿ ದಾಳಿಗಳನ್ನು ಆಯೋಜಿಸುವ ಉಗ್ರರನ್ನು ಬಗ್ಗುಬಡಿಯಲು ಅದಕ್ಕಿಂತ ಹೆಚ್ಚಿನ ಸಂಘಟಿತ ಕಾರ್ಯಯೋಜನೆಯೇ ಸೂಕ್ತ ಎಂಬ ನಂಬಿಕೆಯನ್ನು ಅಂತರರಾಷ್ಟ್ರೀಯ ಸಮುದಾಯ ಹೊಂದಿದೆ. ಈ ಕಾರ್ಯತಂತ್ರವು ಪ್ರಾಂತೀಯವಾಗಿಯೂ ಅನ್ವಯವಾಗಬೇಕು. ಕರ್ನಾಟಕವು ದಕ್ಷಿಣ ಭಾರತದ ಇತರ ರಾಜ್ಯಗಳ ಜೊತೆ ಕೈಜೋಡಿಸಿ, ದುಷ್ಟಶಕ್ತಿಗಳನ್ನು ಇನ್ನಷ್ಟು ಸಂಘಟಿತವಾಗಿ ಎದುರಿಸಬೇಕು. ಉಗ್ರರ ಬಗೆಗಿನ ಮಾಹಿತಿ ಹಂಚಿಕೆ, ಅಂತರರಾಜ್ಯ ಸಂಪರ್ಕಗಳ ವ್ಯಾಪಕ ಬಳಕೆ, ಕ್ಷಿಪ್ರ ಕಾರ್ಯಯೋಜನೆಗಳ ಮೂಲಕ ಉಗ್ರರ ಸಂಚು ವಿಫಲಗೊಳಿಸಬೇಕು. ಇದರ ಜೊತೆಜೊತೆಗೆ, ನಮ್ಮ ಯುವಕರು ಉಗ್ರರ ಬಲೆಗೆ ಬೀಳದಂತೆ ವ್ಯಾಪಕ ಜಾಗೃತಿ ಮೂಡಿಸುವ ಕೆಲಸವನ್ನೂ ಗಂಭೀರವಾಗಿ ಪರಿಗಣಿಸಬೇಕು.