ಸೋಮವಾರ, ಜೂನ್ 1, 2020
27 °C

50 ವರ್ಷಗಳ ಹಿಂದೆ | ಬುಧವಾರ 29–4–1970

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಕ್ಷಾಮ ಪ್ರದೇಶಕ್ಕೆ ಸಮೃದ್ಧಿ: ಆಲಮಟ್ಟಿ ಜಲಾಶಯ ಯೋಜನೆಗೆ ಶಂಕುಸ್ಥಾಪನೆ
ಬಿಜಾಪುರ, ಏ. 28– ಬಿಜಾಪುರ, ಬಿದರೆ, ಕಲ್ಬುರ್ಗಿ, ರಾಯಚೂರು ಜಿಲ್ಲೆಗಳ ಕ್ಷಾಮ ಪ್ರದೇಶಗಳನ್ನು ಸಮೃದ್ಧಿಯ ಬೀಡಾಗಿ ಪರಿವರ್ತಿಸಲಿರುವ ಆಲಮಟ್ಟಿ ಜಲಾಶಯ ಯೋಜನೆಯ ಶಂಕುಸ್ಥಾಪನೆಯನ್ನು ಮುಖ್ಯಮಂತ್ರಿ ಶ್ರೀ ವೀರೇಂದ್ರ ಪಾಟೀಲರು ಇಂದು ನೆರವೇರಿಸಿದರು. ಕೃಷ್ಣಾ ನದಿಗೆ ಅಡ್ಡಲಾಗಿ ನಿರ್ಮಾಣವಾಗಲಿರುವ ಈ ಅಣೆಕಟ್ಟು ರಾಜ್ಯದ ನೀರಾವರಿ ಯೋಜನೆಗಳಲ್ಲಿ ಅತಿ ದೊಡ್ಡದು.

ಹಲವು ಕಾರಣಗಳಿಂದಾಗಿ ಈ ಯೋಜನೆಯನ್ನು ಕಾರ್ಯರೂಪಕ್ಕೆ ತರುವುದರಲ್ಲಿ ನಿಧಾನವಾಯಿತೆಂದ ಮುಖ್ಯಮಂತ್ರಿ, ಯೋಜನೆ ಕೆಲಸವನ್ನು ನಿಲ್ಲಿಸಲು ಯಾರಿಗೂ ಸಾಧ್ಯವಿಲ್ಲವೆಂದರು. ಈ ಭಾಗದ ಜನರ ಬಹುದಿನಗಳ ಬೇಡಿಕೆ ಈಡೇರಿದ್ದಕ್ಕಾಗಿ ಅವರು ಸಂತೋಷ ವ್ಯಕ್ತಪಡಿಸಿ, ಈ ಯೋಜನೆಯಿಂದ ನಿರ್ವಸತಿಗರಾಗಿರುವ ಜನರಿಗೆ ಶೀಘ್ರವಾಗಿ ಪುನರ್ವಸತಿ ಕಲ್ಪಿಸಲಾಗುವುದೆಂದರು.

ಕೈಬರಹ– ಉಕ್ತಲೇಖನ ಪಠ್ಯಕ್ರಮ ಮತ್ತೆ ಜಾರಿಗೆ?
ಬೆಂಗಳೂರು, ಏ. 28– ವಿದ್ಯಾರ್ಥಿಗಳ ಕೈಬರಹ ಉತ್ತಮಗೊಳ್ಳುವಂತಾಗಲು ಹಾಗೂ ಚೊಕ್ಕ ಭಾಷೆ ಬರೆಯುವಂತಾಗಲು ಪ್ರಾಥಮಿಕ ಶಾಲೆಗಳಲ್ಲಿ ಕಾಪಿ ಬರೆಸುವ ಹಾಗೂ ಉಕ್ತ ಲೇಖನ ತರಗತಿಗಳನ್ನು ಕಡ್ಡಾಯ ಮಾಡುವ ಸಂಭವವಿದೆ.

ಇಂದು ಶಿಕ್ಷಣ ಸಚಿವ ಶ್ರೀ ಶಂಕರಗೌಡ ಅವರ ಅಧ್ಯಕ್ಷತೆಯಲ್ಲಿ ನಡೆದ ರಾಜ್ಯ ಶಿಕ್ಷಣ ಸಲಹಾ ಮಂಡಳಿ ಈ ಎರಡು ವಿಷಯಗಳಿಗೆ ಹೆಚ್ಚು ಗಮನ ಕೊಡಬೇಕೆಂದು ಸರ್ಕಾರಕ್ಕೆ ಶಿಫಾರಸು ಮಾಡಿತು. ಖಾಸಗಿ ಶಿಕ್ಷಣ ಸಂಸ್ಥೆಗಳು ಮಿತಿಮೀರಿ ನಾನಾ ರೂಪದ ಶುಲ್ಕಗಳನ್ನು ವಸೂಲು ಮಾಡುತ್ತಿವೆ ಎಂದಿರುವ ಸಾರ್ವಜನಿಕ ದೂರನ್ನು ಇಂದು ನಡೆದ ಮಂಡಳಿಯ ಸಭೆ ಪರಿಶೀಲಿಸಿತು.

ಚೀನೀ ಉಪಗ್ರಹ ಕುರಿತು ಕಳವಳ
ನವದೆಹಲಿ, ಏ. 28– ಹತ್ತು ವರ್ಷಗಳ ಅವಧಿಯ ಚೌಕಟ್ಟಿನಲ್ಲಿ ತಯಾರಿಸುತ್ತಿರುವ ತನ್ನ ಅಂತರಿಕ್ಷ ಕಾರ್ಯಕ್ರಮವನ್ನು ಸರ್ಕಾರವು ಚೀನೀಯರು ಪಥಕ್ಕೆ ಉಪಗ್ರಹವೊಂದನ್ನು ಹಾರಿಸಿ ಬಿಟ್ಟಿರುವುದರ ಬೆಳಕಿನಲ್ಲಿ ಪುನರ್‌ವಿಮರ್ಶಿಸ ಬೇಕಾಗಿದೆ ಎಂದು ರಕ್ಷಣಾ ಸಚಿವ ಶ್ರೀ ಸ್ವರಣ್‌ಸಿಂಗ್‌ ಲೋಕಸಭೆಗೆ ತಿಳಿಸಿದರು.

ಈ ಉಪಗ್ರಹದಿಂದ ಭಾರತದ ಭದ್ರತೆ ಮೇಲಾಗುವ ಪರಿಣಾಮದ ಕುರಿತು ತರಲಾಗಿದ್ದ ಗಮನಸೆಳೆಯುವ ಸೂಚನೆ ಮೇಲೆ ಅವರು ಈ ಹೇಳಿಕೆ ನೀಡಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.