50 ವರ್ಷಗಳ ಹಿಂದೆ | ಶುಕ್ರವಾರ, 5–6–1970

‘ಮೈಸೂರಿನಲ್ಲಿ ಕಾಸರಗೋಡಿನ ವಿಲೀನದ ಬಗ್ಗೆ ನಮಗೆ ಆಸಕ್ತಿಯಿಲ್ಲ. ಆ ಪ್ರಶ್ನೆಯನ್ನು ಈಗ ಎತ್ತಲು ನಮ್ಮ ವಿರೋಧವಿದೆ’ ಎಂದು ಶ್ರೀ ನಿಜಲಿಂಗಪ್ಪ ಮತ್ತು ಡಾ. ನಾಗಪ್ಪ ಆಳ್ವ ಅವರು ಹೇಳಿದರೆಂದು ಅರ್ಥ ಬರುವ ಶ್ರೀ ಹಮೀದ್‌ ಆಲಿ ಅವರ ಹೇಳಿಕೆಯನ್ನು ಮಲಯಾಳಂ ಪತ್ರಿಕೆಗಳು ಪ್ರಧಾನವಾಗಿ ಪ್ರಕಟಿಸಿವೆ. ಮೇಲ್ಕಂಡ ವರದಿಯು ಕಾಸರಗೋಡಿನ ಕನ್ನಡಿಗರಲ್ಲಿ ತೀವ್ರ ಕಳವಳ ಮೂಡಿಸಿದೆ.

ತೃತೀಯ ವೇತನ ಆಯೋಗ: ತಾತ್ಕಾಲಿಕ ಪರಿಹಾರ ಬೇಡಿಕೆ ಪರಿಶೀಲನೆಗೆ ಅವಕಾಶ
ನವದೆಹಲಿ, ಜೂನ್‌ 4– ಅಗತ್ಯ ಆಧಾರಿತ ಕನಿಷ್ಠ ವೇತನ ಹಾಗೂ ತಾತ್ಕಾಲಿಕ ಪರಿಹಾರ ಬೇಕೆಂಬ ಕೇಂದ್ರ ನೌಕರರ ಬೇಡಿಕೆಗಳನ್ನು ಪರಿಶೀಲಿಸಲು ಅನುಕೂಲವಾಗುವಂತೆ ತೃತೀಯ ವೇತನ ಆಯೋಗ ಪರಿಶೀಲಿಸಬೇಕಾದ ಅಂಶಗಳನ್ನು ಕೇಂದ್ರ ಸರ್ಕಾರ ತಿದ್ದುಪಡಿ ಮಾಡಿದೆ.

15ನೇ ಭಾರತೀಯ ಕಾರ್ಮಿಕ ಸಮ್ಮೇಳನದ ಶಿಫಾರಸುಗಳನ್ನು ಗಣನೆಗೆ ತೆಗೆದುಕೊಂಡು ವೇತನ ಆಯೋಗ ಪರಿಶೀಲಿಸಬೇಕಾದ ಅಂಶಗಳನ್ನು ನಿಖರಗೊಳಿಸಲಾಗಿದೆ.