ನವದೆಹಲಿ, ಮೇ 27 (ಪಿಟಿಐ, ಯುಎನ್‌ಐ)– ಜಮ್ಮು–ಕಾಶ್ಮೀರದ ಕಾರ್ಗಿಲ್ ವಲಯದಿಂದ ಪಾಕಿಸ್ತಾನ ಬೆಂಬಲಿತ ಉಗ್ರರನ್ನು ಹೊರ ಹಾಕಲು ನಡೆಸುತ್ತಿರುವ ಕಾರ್ಯಾಚರಣೆಯಲ್ಲಿ ಭಾರತೀಯ ವಾಯುಪಡೆಯ ಎರಡು ಮಿಗ್ ಯುದ್ಧ ವಿಮಾನಗಳು ನಾಶವಾಗಿವೆ. ಪಾಕಿಸ್ತಾನದ ಕ್ಷಿಪಣಿ ಒಂದು ವಿಮಾನವನ್ನು ಹೊಡೆದುರುಳಿಸಿದ್ದು, ಇನ್ನೊಂದು ತಾಂತ್ರಿಕ ದೋಷದಿಂದ ದುರಂತಕ್ಕೀಡಾಯಿತೆಂದು ರಕ್ಷಣಾ ಪಡೆ ಮೂಲ ತಿಳಿಸಿದೆ.
ಆದರೆ ಗಡಿ ಸೀಮೆ ಉಲ್ಲಂಘಿಸಿ ತಮ್ಮ ವ್ಯಾಪ್ತಿಯೊಳಕ್ಕೆ ನುಸುಳಿದ ಎರಡು ಯುದ್ಧ ವಿಮಾನಗಳನ್ನು ತಾನು ಹೊಡೆದುರುಳಿಸಿದ್ದಾಗಿ ಪಾಕಿಸ್ತಾನ ಹೇಳಿಕೊಂಡಿದೆ. ಇದರಿಂದಾಗಿ ಎರಡೂ ದೇಶಗಳ ನಡುವೆ ಆತಂಕದ ವಾತಾವರಣ ಸೃಷ್ಟಿಯಾಗಿದೆ.
ಭಾರತದ ಬಂಧಿತ ಪೈಲಟ್ ಯುದ್ಧ ಕೈದಿ–ಪಾಕ್
ಇಸ್ಲಾಮಾಬಾದ್, ಮೇ 27 (ಪಿಟಿಐ, ಯುಎನ್‌ಐ)– ತಮ್ಮ ಪಡೆಗಳು ಬಂಧಿಸಿರುವ ಭಾರತದ ಮಿಗ್ ಯುದ್ಧ ವಿಮಾನವೊಂದರ ಚಾಲಕನನ್ನು ‘ಯುದ್ಧ ಕೈದಿ’ ಎಂದು ಪರಿಗಣಿಸುವುದಾಗಿ ಪಾಕಿಸ್ತಾನ ಪ್ರಕಟಿಸಿದೆ.
