50 ವರ್ಷಗಳ ಹಿಂದೆ| ಭಾನುವಾರ, 10–9–1972

ಟೆಲ್‌ಅವಿವ್‌, ಸೆ. 9– ಗೋಲನ್‌ ಪರ್ವತ ಪ್ರದೇಶದಲ್ಲಿ ಇಂದು ಇಸ್ರೇಲ್‌ ಮತ್ತು ಸಿರಿಯಾ ನಡುವೆ ನಡೆದ ಉಗ್ರ ವಿಮಾನ ಕಾಳಗದಲ್ಲಿ ಸಿರಿಯಾಕ್ಕೆ ಅಪಾರ ಹಾನಿ ಉಂಟಾಗಿದೆ. ಗೋಲನ್‌ ಪರ್ವತ ಪ್ರದೇಶದಲ್ಲಿನ ತನ್ನ ಸೈನಿಕ ನೆಲೆಗಳ ಮೇಲೆ ದಾಳಿ ನಡೆಸಲೆತ್ನಿಸಿದ ಮೂರು ಸಿರಿಯನ್‌ ವಿಮಾನಗಳನ್ನು ಹೊಡೆದುರುಳಿ
ಸಲಾಯಿತೆಂದು ಇಸ್ರೇಲಿನ ಮಿಲಿಟರಿ ವಕ್ತಾರರು ಇಂದು ಇಲ್ಲಿ ತಿಳಿಸಿದರು.

ಸಿರಿಯಾದ ವಿಮಾನಗಳು ಇಸ್ರೇಲ್‌ ನೆಲೆಗಳಿಗೆ ಯಾವ ಹಾನಿಯನ್ನೂ ಉಂಟು ಮಾಡಿಲ್ಲ. ಇಸ್ರೇಲಿ ವಿಮಾನಗಳು ಸುರಕ್ಷಿತವಾಗಿ ನೆಲೆಗೆ ವಾಪಸಾದವೆಂದು ವಕ್ತಾರರು ಹೇಳಿದರು.

ಡಿವಿಜಿ ಅವರ ಸ್ಥಿತಿಯಲ್ಲಿ ಸುಧಾರಣೆ

ಬೆಂಗಳೂರು, ಸೆ. 9– ಲಘು ಹೃದಯಾಘಾತಕ್ಕೊಳಗಾಗಿ ನಿನ್ನೆ ಸೇಂಟ್‌ ಮಾರ್ಥಾ ಆಸ್ಪತ್ರೆಗೆ ಸೇರಿಸಲ್ಪಟ್ಟ ಡಾ.ಡಿ.ವಿ. ಗುಂಡಪ್ಪ ಅವರು ಚೇತರಿಸುತ್ತಿದ್ದು, ‘ಇದೀಗ ಕಳವಳಕ್ಕೆ ಏನೂ ಕಾರಣವಿಲ್ಲ’ ಎಂದು ವೈದ್ಯರು ತಿಳಿಸಿದರು.

ರಾಜ್ಯಪಾಲ ಶ್ರೀ ಎಂ.ಎಲ್‌. ಸುಖಾಡಿಯಾ ಅವರನ್ನು ಒಳಗೊಂಡು ಅನೇಕ ಮಂದಿ ಪ್ರಮುಖರು ಆಸ್ಪತ್ರೆಗೆ ಭೇಟಿ ನೀಡಿ, ಡಿವಿಜಿ ಅವರ ಆರೋಗ್ಯ ವಿಚಾರಿಸಿ, ಶೀಘ್ರ ಸುಖ ಹಾರೈಸಿದರು.