ಬಂಡೀಪುರ ಮೇಲ್ಸೇತುವೆ ಆಘಾತಕಾರಿ

ಕೇರಳ ಸರ್ಕಾರ ಮತ್ತು ಅಲ್ಲಿನ ವ್ಯಾಪಾರಿಗಳು, ಕರ್ನಾಟಕದ ವನ್ಯ ಸಂಪತ್ತು ಮತ್ತು ಜೀವ ಸಂಪತ್ತಿಗೆ ಮಾರಕವಾಗಿರುವ ಈ ರಸ್ತೆಯ ಮೇಲೆ ದುಂಬಾಲು ಬೀಳುತ್ತಿರುವುದು ಅವರ ಕ್ಷುಲ್ಲಕ ಮನಸ್ಸಿನ ಪ್ರತೀಕವಾಗಿದೆ. ಕೇರಳದಿಂದ ನಮ್ಮ ರಾಜ್ಯಕ್ಕೆ ವಾಹನಗಳು ಓಡಾಡಲು ಬೇರೆ ರಸ್ತೆಗಳು ಇರುವಾಗ ಈ ದಾರಿಯೇ ಬೇಕೆಂದು ಹಟ ಹಿಡಿಯುತ್ತಿರುವುದನ್ನು ಗಮನಿಸಿದರೆ ಅವರ ಉದ್ದೇಶ ಬೇರೆ ಇರಬಹುದೇನೊ ಎಂಬ ಅನುಮಾನ ಬರುತ್ತದೆ.

ಬಂಡೀಪುರದ ಪಕ್ಷಿ– ಪ್ರಾಣಿಗಳ ಸಹಜ ಸಂಚಾರಕ್ಕೆ ಈ ಮೇಲ್ಸೇತುವೆ ಸಂಚಕಾರ ತರುವುದರಲ್ಲಿ ಎರಡು ಮಾತಿಲ್ಲ. ಮಾತ್ರವಲ್ಲ, ನಮ್ಮ ಸ್ವಾಭಾವಿಕ ಪರಿಸರಕ್ಕೂ ಈ ಸೇತುವೆ ಮಾರಕವಾಗುತ್ತದೆ. ಕ್ರಮೇಣ ಇಲ್ಲಿನ ವೃಕ್ಷಸಂಪತ್ತಿಗೂ ಕೊಡಲಿ ಏಟು ಬೀಳುವುದರ ಬಗ್ಗೆಯೂ ಅನುಮಾನವಿಲ್ಲ.

ಈ ಬಗ್ಗೆ ಸ್ಥಳೀಯ ರಾಜಕೀಯ ಮುಂದಾಳುಗಳು, ರಾಜ್ಯದ ಹಿತಚಿಂತಕರು, ಸಂಘಸಂಸ್ಥೆಗಳು ಗಟ್ಟಿಯಾಗಿ ಧ್ವನಿ ಎತ್ತಬೇಕಿದೆ. ಯಾವ ಕಾರಣಕ್ಕೂ ಬಂಡೀಪುರದಲ್ಲಿ ಮೇಲು ಸೇತುವೆ ಆಗಲು ಬಿಡಬಾರದು. ಕರ್ನಾಟಕದ ಮುಖ್ಯಮಂತ್ರಿ ಈ ಕುರಿತು ತಮ್ಮ ಅಸಮ್ಮತಿಯನ್ನು ವ್ಯಕ್ತಪಡಿಸಿದ್ದಾರೆ. ಅವರ ನಿಲುವು ಕೊನೆಯವರೆಗೂ ಇದೇ ಆಗಿರಲಿ. ಬಂಡೀಪುರದ ಹಿತರಕ್ಷಣೆಯ ಮೂಲಕ ನಮ್ಮ ರಾಜ್ಯದ ಹಿತವನ್ನು ಜತನದಿಂದ ಕಾಪಾಡಲಿ. ಬಂಡೀಪುರ ಅರಣ್ಯ ಮತ್ತು ಹುಲಿಧಾಮ ನಮ್ಮ ರಾಜ್ಯದ ಸ್ವಾಭಾವಿಕ ಹಕ್ಕು. ಅದನ್ನು ಯಾರೂ ಪ್ರಶ್ನಿಸುವಂತಿಲ್ಲ.