ವಿದೇಶಿ ಕಂಪನಿಗಳಲ್ಲಿ ಚಾಕರಿ ಮಾಡುವಂಥ ಒಂದು ವರ್ಗವನ್ನು ಸೃಷ್ಟಿಸಿರುವುದನ್ನೇ ದೊಡ್ಡ ಸಾಧನೆಎಂದು ಹೇಳಿಕೊಂಡು ನಾವು ಬೀಗುತ್ತಿದ್ದೇವೆ. ಇಂಗ್ಲಿಷ್ ಮಾಧ್ಯಮ ಶಿಕ್ಷಣದಿಂದ ಆಗುತ್ತಿರುವ ಈ ನೆಲದ ಪ್ರತಿಭೆಯ ಪೋಲು ಮತ್ತು ಅಪವ್ಯಯಗಳನ್ನು ಯಾರೂ ಲೆಕ್ಕಕ್ಕೆ ತೆಗೆದುಕೊಳ್ಳದೇ ಇರುವುದು ದಿಗ್ಭ್ರಮೆ ಹುಟ್ಟಿಸುವಂಥ ಸಂಗತಿ. ನಮ್ಮ ಶಿಕ್ಷಣ ನಮ್ಮ ಭಾಷೆಯಾದ ಕನ್ನಡದಲ್ಲೇ ನಡೆಯಬೇಕು. ಇದರ ಜತೆಗೆ ಇಂಗ್ಲಿಷ್ ಸೇರಿದಂತೆ ಹತ್ತಾರು ಭಾಷೆಗಳನ್ನು ‘ಕಮ್ಯುನಿಕೇಟಿವ್’ ಆಗಿ ಚೆನ್ನಾಗಿ ಕಲಿಸಬೇಕು. ‘ವಸಾಹತುಶಾಹಿ ಆಡಳಿತದ
ವಿಷವರ್ತುಲದಲ್ಲಿದ್ದ ದೇಶಗಳಲ್ಲಿ ತಾಂಡವವಾಡುತ್ತಿರುವ ಇಂಗ್ಲಿಷ್ ಭಾಷೆಯು ಒಂದು ಕಲ್ಚರ್ ಬಾಂಬ್ ಇದ್ದಂತೆ’ ಎಂಬ ಲೇಖಕ ಗೂಗಿ ವಾ ಥಿಯೋಂಗ್‌ನ ಮಾತು ನಮಗೆ ಎಚ್ಚರಿಕೆಯ ಗಂಟೆಯಾಗಬೇಕು. ನಮ್ಮ ಭಾಷೆ ಉಳಿಯದಿದ್ದರೆ ನಮ್ಮ ಸಾಹಿತ್ಯ, ಸಂಸ್ಕೃತಿ, ಮೌಲ್ಯಪ್ರಜ್ಞೆ ಯಾವುದಕ್ಕೂ ಉಳಿಗಾಲವಿಲ್ಲ.
