ರಾಜ್ಯ ಸರ್ಕಾರ ಮತ್ತೆ ಕಡತ ಯಜ್ಞ ಪ್ರಾರಂಭಿಸಿರುವುದು ಸ್ವಾಗತಾರ್ಹ. ಈ ತಂತ್ರಜ್ಞಾನ ಯುಗದಲ್ಲಿಯೂ ತಮ್ಮ ಕೆಲಸ–ಕಾರ್ಯಗಳಿಗಾಗಿ ಕಂಬ ಸುತ್ತುವುದು ನಾಗರಿಕರಿಗೆ ತಪ್ಪಿಲ್ಲ ಎಂಬುದು ಶೋಚನೀಯ. ಈ ಬಗೆಯ ಅಲೆದಾಟವು ಹಿರಿಯ ನಾಗರಿಕರನ್ನು ಮತ್ತಷ್ಟು ಹಣ್ಣಾಗಿಸುತ್ತದೆ. ಕಡತ ಯಜ್ಞದ ಶುಭಾರಂಭಕ್ಕೆ ಸರ್ಕಾರ ಈ ರಾಜ್ಯೋತ್ಸವ ತಿಂಗಳನ್ನು ಆಯ್ಕೆ ಮಾಡಿಕೊಂಡದ್ದು ಒಳ್ಳೆಯದೇ. ಹಿಂದೆ ಗುಂಡೂರಾವ್‌ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ಈ ಯಜ್ಞ ಶುರುವಾಗಿತ್ತು. ಭೂ ನ್ಯಾಯ ಮಂಡಳಿಗಳಲ್ಲಿ ಅನೇಕ ವರ್ಷಗಳಿಂದ ಕಡತಗಳು ಬಾಕಿ ಉಳಿದಿವೆ. ಇವೆಲ್ಲ ತ್ವರಿತವಾಗಿ ಇತ್ಯರ್ಥಗೊಳ್ಳಬೇಕು. ದಿನಗೂಲಿಗಳಿಗೆ ಸಂಬಂಧಿಸಿದವು, ಪಿಂಚಣಿ ಪ್ರಕರಣಗಳಿಗೆ ಸಂಬಂಧಿಸಿದಂಥ ಕಡತಗಳು ಕೂಡ ಇತ್ಯರ್ಥಗೊಳ್ಳದೆ ದೂಳು ತಿನ್ನುತ್ತಿವೆ. ಇಂತಹ ಕಡತಗಳಿಗೆ ಈ ಯಜ್ಞದಲ್ಲಾದರೂ ಮೋಕ್ಷ ಸಿಗಲಿ.
