ಸಂಸ್ಕೃತವು ಸಾವಿರಾರು ಭಾಷೆಗಳ ಮುಖಾಂತರ ನಿಸ್ಸಂಶಯವಾಗಿ ಜನಬಳಕೆಯಲ್ಲಿದೆ. ಇಲ್ಲಿ ಗಮನಿಸಬೇಕಾದ ವಿಷಯವೆಂದರೆ, ಕನ್ನಡ ಅಥವಾ ಅನ್ಯ ಭಾಷೆಗಳು ಸಂಸ್ಕೃತದ ಪ್ರತಿಸ್ಪರ್ಧಿಗಳಲ್ಲ, ಎಲ್ಲವೂ ಒಂದಕ್ಕೊಂದು ಪೂರಕವಾಗಿವೆ. ಭಾಷಾ ಕಲಿಕೆಯ ಉತ್ಸಾಹಕ್ಕೆ ಭಾಷೆ- ದೇಶ- ಪ್ರದೇಶದ ಬೇಲಿಗಳನ್ನು ಹಾಕುವುದು ಸರ್ವಥಾ ತಪ್ಪು. ಶಾಲೆ ಕಾಲೇಜುಗಳಲ್ಲಿ ಸಂಸ್ಕೃತವನ್ನು ನಿರರ್ಗಳವಾಗಿ ಮಾತನಾಡಲು ಕಲಿಸುತ್ತಿರುವ ಸಾವಿರಾರು ಶಿಕ್ಷಕರ ಉದಾಹರಣೆಗಳಿವೆ. ವಿದ್ಯಾರ್ಥಿಗಳು ಅತ್ಯಂತ ಉತ್ಸಾಹದಿಂದ ಸಂಸ್ಕೃತದಲ್ಲಿ ಮಾತನಾಡುತ್ತಿದ್ದಾರೆ, ಕಲಿಯುತ್ತಿದ್ದಾರೆ ಎಂದು ಆತ್ಮವಿಶ್ವಾಸದಿಂದ ಮತ್ತು ನನ್ನ ಅನುಭವದ ಆಧಾರದಿಂದ ಹೇಳಬಲ್ಲೆ. ನೂತನ ಶಿಕ್ಷಣ ನೀತಿ ಏಕಕಾಲಕ್ಕೆ ಎರಡು ಪದವಿಗಳನ್ನು ಕಲಿಯಲು ಅವಕಾಶ ಮಾಡಿಕೊಟ್ಟಿದೆ. ನನ್ನ ಒಬ್ಬ ವಿದ್ಯಾರ್ಥಿನಿ ಐಐಟಿ ಚೆನ್ನೈಯಲ್ಲಿ ಕಂಪ್ಯೂಟರ್ ಪದವಿಯ ಜೊತೆಗೆ ಚಿನ್ಮಯ ಯೂನಿವರ್ಸಿಟಿಯಲ್ಲಿ ಸಂಸ್ಕೃತದ ಪದವಿಯನ್ನೂ ಅಭ್ಯಾಸ ಮಾಡುತ್ತಿದ್ದಾಳೆ. ಸಂಸ್ಕೃತದ ಲಾಭಗಳ ಬಗ್ಗೆ ಅತಿರಂಜಿತ ಹೇಳಿಕೆಗಳು ತಪ್ಪು.