ಶುಕ್ರವಾರ, ಸೆಪ್ಟೆಂಬರ್ 25, 2020
22 °C

ವಾಚಕರ ವಾಣಿ | ಬಿಎಸ್‌ಎನ್‌ಎಲ್‌ ‘ಮುಗಿಸುವ’ ಧೋರಣೆ ಸರಿಯೇ?

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಸರ್ಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌ ಹಾಗೂ ಏರ್ ಇಂಡಿಯಾ ಕಂಪನಿಗಳನ್ನು ರೋಗಗ್ರಸ್ತವೆಂದು ಹಳಿದು, ಬಿಎಸ್‌ಎನ್‌ಎಲ್‌ ತುಂಬ ದೇಶದ್ರೋಹಿಗಳೇ ಇರುವರೆಂದೂ ಅದನ್ನು ಖಾಸಗಿಯವರಿಗೆ ವಹಿಸಿ ಮುಗಿಸಿಬಿಡುವುದಾಗಿಯೂ ಸಂಸದ ಅನಂತಕುಮಾರ ಹೆಗಡೆ ಅವರು ಹೇಳಿದ್ದು ಓದಿ (ಪ್ರ.ವಾ., ಆ. 12) ಅತ್ಯಂತ ಆಘಾತವಾಯಿತು.

ನಮ್ಮ ಹೆಮ್ಮೆಯ ಇಸ್ರೊ ಹಾರಿಸಿದ ಉಪಗ್ರಹಗಳ ತರಂಗಾಂತರವನ್ನು ಖಾಸಗಿ ಟೆಲಿಕಾಂ ಕಂಪನಿಗಳಿಗೆ ಮಾರಿ, ಮೊಬೈಲ್ ಟವರ್‌ಗಳೆಂಬ ಲೋಹದ ಅಸ್ತಿಪಂಜರವನ್ನಷ್ಟೇ ಬಿಎಸ್‌ಎನ್‌ಎಲ್‌ಗಾಗಿ ಉಳಿಸಿ, ಉತ್ತಮ ನೆಟ್‍ವರ್ಕ್ ಕೊಡಿ ಎಂದರೆ ಬಿಎಸ್‌ಎನ್‌ಎಲ್‌ ಸಿಬ್ಬಂದಿ ಏನು ಮಾಡಿಯಾರು? ನಮ್ಮ ತಾಯ್ನೆಲದ ಹೆಮ್ಮೆಯ ಕೂಸಾಗಿದ್ದ ಸಂಸ್ಥೆಯೊಂದು ರೋಗಗ್ರಸ್ತವಾಗಿದ್ದರೆ ಅದಕ್ಕೆ ಕಳವಳಗೊಂಡು, ಸುಸ್ಥಿತಿಗೆ ತರುವ ಕ್ರಮ ಕೈಗೊಳ್ಳುವುದು ಬಿಟ್ಟು ಅದನ್ನು ‘ಮುಗಿಸಿ’ ಖಾಸಗಿಯವರಿಗೆ ಮಾರಲು ಹೊರಡುವ ಧೋರಣೆಯು ಭವ್ಯಭಾರತದ ಭವಿಷ್ಯದ ಕುರಿತು ಆತಂಕ ಹುಟ್ಟಿಸುವಂತಿದೆ.

ಬಿಎಸ್‌ಎನ್‌ಎಲ್‌ ಉಳಿದರೆ ನಮ್ಮವರೇ ಆದ ಅದರ ಸಿಬ್ಬಂದಿಯ ಕೆಲಸ ಉಳಿಯುತ್ತದೆ, ಸರ್ಕಾರದ ಆದಾಯಕ್ಕೊಂದು ಮೂಲ ಒದಗುತ್ತದೆ. ಮಾಹಿತಿ- ಸೇವೆಗಾಗಿ ಸರ್ಕಾರ ತನ್ನದೇ ನಂಬಲರ್ಹ ಜಾಲವನ್ನು ಹೊಂದಿದ ಹಾಗೂ ಆಗುತ್ತದೆ. ಎಂದೇ ಈ ಸಂಕಟದ ಕಾಲದಲ್ಲಿ ‘ಆತ್ಮನಿರ್ಭರ್’ ಎನ್ನುವುದು ಖಾಸಗಿಪರ ಧೋರಣೆಯಾಗದೆ, ಸರ್ಕಾರಿ ಸಂಸ್ಥೆಗಳನ್ನು ಪುನರುಜ್ಜೀವನಗೊಳಿಸುವ ದೃಢ ನಿಶ್ಚಯವಾಗಬೇಕು. ಇದೇ ನೈಜ ದೇಶಪ್ರೇಮವೆಂದು ಜನರೂ ತಿಳಿದು, ತಿಳಿಸಿಕೊಡಬೇಕು.

-ಡಾ. ಎಚ್.ಎಸ್.ಅನುಪಮಾ, ಕವಲಕ್ಕಿ, ಹೊನ್ನಾವರ

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು