ನಂದಿನಿ ಬ್ರ್ಯಾಂಡ್‌ನ ಎಲ್ಲ ಮಾದರಿಯ ಹಾಲು, ಮೊಸರಿನ ದರವನ್ನು ಪ್ರತೀ ಲೀಟರ್‌ಗೆ ಎರಡು ರೂಪಾಯಿ ಏರಿಸಲಾಗಿದೆ. ಅದರಂತೆ ಟೋನ್ಡ್ ಹಾಲು ₹ 39, ಹಾಗೂ ಸ್ಪೆಷಲ್ ಹಾಲು, ಶುಭಂ ಹಾಲಿನ ಲೀಟರ್ ದರ ತಲಾ ₹ 45 ಹಾಗೂ ಮೊಸರಿನ ದರ ಲೀಟರ್‌ಗೆ ₹ 47 ಇದೆ. ಈ ದರಗಳು ಬೆಸಸಂಖ್ಯೆಯಲ್ಲಿ ಇರುವುದರಿಂದ, ಅರ್ಧ ಲೀಟರ್‌ನ ದರಗಳು ಕ್ರಮವಾಗಿ ₹ 19.50, ₹ 22.50 ಹಾಗೂ ₹ 23.50 ಆಗುತ್ತವೆ. ಹಿಂದಿನ ಬಾರಿಯ ಹೆಚ್ಚಳದಲ್ಲೂ ಇದೇ ಪರಿಸ್ಥಿತಿ ಇತ್ತು. ಈಗ ಐವತ್ತು ಪೈಸೆಯ ನಾಣ್ಯ ಸಂಪೂರ್ಣವಾಗಿ ಮರೆಯಾಗಿರುವುದರಿಂದ ಈ ಹೆಚ್ಚಳ ವರ್ತಕರಿಗೆ ಅನಧಿಕೃತವಾಗಿ ಐವತ್ತು ಪೈಸೆಯ ಲಾಭ ಪಡೆಯಲು ಅನುವು ಮಾಡಿಕೊಡುತ್ತದೆ. ಕರ್ನಾಟಕ ಹಾಲು ಮಹಾಮಂಡಳಕ್ಕೆ (ಕೆಎಂಎಫ್) ಇದು ತಿಳಿಯದ್ದೇನೂ ಅಲ್ಲ.
