‘ಚಿಕ್ಕೋಡಿ ಜಿಲ್ಲೆಯಾಗುವುದು ಎಂದು?’ ಎಂದು ವೆಂಕಟೇಶ ಮಾಚಕನೂರ ಕೇಳಿದ್ದಾರೆ (ವಾ.ವಾ., ಅ. 4). ಈ ಬೇಡಿಕೆ ಅಲ್ಲಗಳೆಯುವಂಥದ್ದಲ್ಲ. ಆದರೆ ಚಿಕ್ಕೋಡಿಯು ಜಿಲ್ಲಾ ಕೇಂದ್ರ ಬೆಳಗಾವಿಯಿಂದ ಕೇವಲ 70 ಕಿ.ಮೀ. ಅಂತರದಲ್ಲಿದೆ. ಆದರೆ ಅಥಣಿ ಗಡಿ ಭಾಗದ ಕೇಂದ್ರವಾಗಿದ್ದು, ಜಿಲ್ಲಾ ಕೇಂದ್ರದಿಂದ 150 ಕಿ.ಮೀ.ಗಿಂತಲೂ ಹೆಚ್ಚು ದೂರದಲ್ಲಿದೆ ಎಂಬುದು ಗಮನಾರ್ಹ. ಅಥಣಿಯು ರಾಜ್ಯದ ಅತಿ ದೊಡ್ಡ ತಾಲ್ಲೂಕುಗಳಲ್ಲಿ ಒಂದು. ಇಲ್ಲಿ ಎರಡು ವಿಧಾನಸಭಾ–ಅಥಣಿ ಮತ್ತು ಕಾಗವಾಡ– ಕ್ಷೇತ್ರಗಳಿವೆ. ಈ ಕಾರಣಕ್ಕಾಗಿ ಜಿಲ್ಲೆಯಾಗುವ ಎಲ್ಲ ಅರ್ಹತೆ ಪಡೆದಿದೆ. ಗಡಿಭಾಗದ ಅನಂತಪೂರ, ತೆಲಸಂಗ, ಸಾವಳಗಿ, ಸತ್ತಿ ಮತ್ತು ಹಾರೂಗೇರಿ ಹೋಬಳಿಗಳು ನೂತನ ತಾಲ್ಲೂಕುಗಳಾಗಬೇಕೆಂಬ ಬೇಡಿಕೆ ಇದೆ. ಇವು ರಚನೆಯಾದರೆ ಮತ್ತು ಅಥಣಿಗೆ ಹೊಸ ಜಿಲ್ಲೆಯಾಗುವ ಅವಕಾಶ ದೊರೆತರೆ 45 ಕಿ.ಮೀ. ಅಂತರದಲ್ಲಿ 8 ತಾಲ್ಲೂಕುಗಳು ಈ ನೂತನ ಜಿಲ್ಲೆಗೆ ಸೇರ್ಪಡೆಯಾಗಬಹುದು. ಸರ್ಕಾರ ಈ ಕುರಿತು ಗಂಭೀರ ಚಿಂತನೆ ನಡೆಸಲಿ.
