ಶುಚಿತ್ವ– ಅಪಾಯ

ಒಂದು ಹೊಸ ಬಡಾವಣೆಯಲ್ಲಿ ಮನೆ ಮಾಡಿಕೊಂಡಿದ್ದೆ. ಎಂಜಿನಿಯರ್‌ ಕೊಟ್ಟ ನಕ್ಷೆಯ ಪ್ರಕಾರ ಅಲ್ಲಿ ಕಾಲುವೆಯ ನೀರು ಉತ್ತರಕ್ಕೆ ಹರಿಯಬೇಕಿತ್ತು. ಆದರೆ ಆ ಕಡೆ ಏರುಇದ್ದದ್ದರಿಂದ ನೀರು ಎಂಜಿನಿಯರ್‌ ಮಾತನ್ನು ಕೇಳದೇ ದಕ್ಷಿಣಕ್ಕೇ ಮುಖ ಮಾಡುತ್ತಿತ್ತು. ಹೀಗಾಗಿ ಗಟಾರದ ನೀರೆಲ್ಲವೂ ನಮ್ಮ ಮನೆ ಬಾಗಿಲ ಕಾಲುವೆಯಲ್ಲಿ ನಿಂತಿರುತ್ತಿತ್ತು.

ರಜಾದಿನಗಳಲ್ಲಿ ಆ ನೀರಿನಲ್ಲಿ ಕೆಲವು ಬಡ ಕುಟುಂಬಗಳ ಹುಡುಗರು ಗಂಟೆಗಟ್ಟಲೆ ಮುಳುಗೇಳುತ್ತಿದ್ದರು. ಇಡೀ ಊರಿನ ಗಲೀಜನ್ನೆಲ್ಲ ತುಂಬಿಕೊಂಡಿದ್ದ ಆ ನೀರು, ಹುಡುಗರಿಗೆ ಯಾವ ಹಾನಿಯನ್ನೂ ಮಾಡಿದ್ದು ಕಂಡು ಬರಲಿಲ್ಲ. ಆದರೆ ಎಂದೂ ಆ ನೀರನ್ನು ಮುಟ್ಟದ, ಶುದ್ಧ ನೀರನ್ನೇ ಕುಡಿಯುತ್ತಿದ್ದ ನಾವು ಮಾತ್ರ ಆಗಾಗ ಮಾತ್ರೆಗಳನ್ನು ನುಂಗುತ್ತಿದ್ದುದು ಸುಳ್ಳಲ್ಲ.