ನಾಯಕರನ್ನು ಬೆಳೆಸುವ ಅಖಾಡ ಏನಾಗುತ್ತಿದೆ?

ನಗರ ಸ್ಥಳೀಯ ಸಂಸ್ಥೆಗಳ ಅಧ್ಯಕ್ಷ, ಉಪಾಧ್ಯಕ್ಷ ಸ್ಥಾನಕ್ಕೆ ಮೀಸಲಾತಿ ನಿಗದಿಗೊಳಿಸುವ ಪ್ರಕ್ರಿಯೆಯಲ್ಲಿ ಆಡಳಿತಾರೂಢರು ಪಕ್ಷ ರಾಜಕಾರಣಕ್ಕೆ ಒತ್ತು ಕೊಟ್ಟು ಮೀಸಲಾತಿಯನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿರುವುದು ಅಭಿವೃದ್ಧಿಗೆ ಮಾರಕ ಎಂಬುದನ್ನು ಒತ್ತಿ ಹೇಳಿದ ಸಂಪಾದಕೀಯವು (ಪ್ರ.ವಾ., ಅ. 13) ಸಾಂದರ್ಭಿಕವಾಗಿದೆ ಮತ್ತು ಸಮರ್ಪಕವಾಗಿದೆ. ಪ್ರಜಾಪ್ರಭುತ್ವದ ಬೇರುಗಳು ಬಲಗೊಳ್ಳಬೇಕಾದರೆ ಅದರಲ್ಲಿ ಸ್ಥಳೀಯ ಸರ್ಕಾರಗಳ ಪಾತ್ರ ಬಹಳ ಮುಖ್ಯ. ಆದರೆ ನಮ್ಮನ್ನು ಆಳುವವರು ಈ ಅವಕಾಶವನ್ನು ತಮ್ಮ ಸ್ವಾರ್ಥಕ್ಕಾಗಿ, ರಾಜಕೀಯ ಲಾಭಕ್ಕಾಗಿ ದುರ್ಬಳಕೆ ಮಾಡಿಕೊಳ್ಳುತ್ತಿರುವುದು ದುರದೃಷ್ಟಕರ. ನಾಯಕತ್ವವನ್ನು ಬೆಳೆಸುವ ಅಖಾಡಗಳಾಗಬೇಕಾದ ಈ ಸಂಸ್ಥೆಗಳು ಇಂದು ದಾರಿ ತಪ್ಪಿರುವುದು ಇದೇ ಕಾರಣಕ್ಕಾಗಿ.