ಮತದಾನ ಮಾಡದವರಿಗೆ ರಜೆ ಬೇಡ

ಎಷ್ಟೆಲ್ಲ ಜಾಗೃತಿ ಮೂಡಿಸಿದರೂ, ಮತದಾರರು ಮತದಾನದ ಮಹತ್ವವನ್ನು ಮನಗಾಣದಿದ್ದರೆ ಎಲ್ಲವೂ ನಿಷ್ಪ್ರಯೋಜಕ. ಕಡ್ಡಾಯ ಮತದಾನದ ಬಗ್ಗೆ ಆಗೀಗ ಚರ್ಚೆಗಳು ನಡೆಯುತ್ತವಾದರೂ ಇನ್ನೂ ಸ್ಪಷ್ಟತೆ ಮೂಡಿಲ್ಲ. ಕೈಬೆರಳ ಮಾಸದ ಮಸಿಯಿಂದ ಮತದಾನ ಮಾಡಿದವರನ್ನು ಗುರುತಿಸಲು ಸುಲಭವಿರುವುದರಿಂದ, ಯಾರು ಮತದಾನ ಮಾಡಿಲ್ಲವೋ ಅಂಥವರಿಗೆ ಚುನಾವಣಾ ದಿನದಂದು ರಜೆಯನ್ನು ಮಂಜೂರು ಮಾಡಬಾರದು.

ಸರ್ಕಾರಿ ಹಾಗೂ ಖಾಸಗಿ ಸಂಸ್ಥೆಗಳಿಗೆ ಈ ಬಗ್ಗೆ ಚುನಾವಣಾ ಆಯೋಗವು ಸೂಚನೆ ನೀಡಿದಲ್ಲಿ, ಮತದಾನದ ಪ್ರಮಾಣ ಗಣನೀಯವಾಗಿ ಹೆಚ್ಚಬಹುದು. ಆಯೋಗವು ಈ ಒಂದು ಸಣ್ಣ ಪ್ರಯತ್ನ ಮಾಡಲಿ.