ಅಕಾಡೆಮಿ ಅಧ್ಯಕ್ಷರ ರಾಜೀನಾಮೆ | ಸಾಹಿತಿಗಳೋ ಆಸ್ಥಾನ ಕವಿಗಳೋ?

ಸರ್ಕಾರ ಯಾವುದೇ ಇರಲಿ, ಕನ್ನಡದ ಕೆಲಸ ಅಬಾಧಿತವಾಗಿ ನಡೆಯುತ್ತಿರಬೇಕು ಎಂಬ ಬದ್ಧತೆ ತೋರಿಸುವ ಸಾಹಿತಿಗಳ ಅಗತ್ಯ ಇಂದು ಕನ್ನಡಕ್ಕಿದೆ. ಅಕಾಡೆಮಿ, ಪ್ರಾಧಿಕಾರಗಳ ಪದಾಧಿಕಾರಿಗಳನ್ನು ರಾಜಕಾರಣಿಗಳು ತಮ್ಮಿಚ್ಛೆಯಂತೆ ಬದಲಾಯಿಸಲು ಸಾಧ್ಯವಾಗದಂತೆ ಕಟ್ಟುನಿಟ್ಟಾದ ಕಾನೂನನ್ನು ರೂಪಿಸಬೇಕಾಗಿದೆ. ಅಂತಹ ಕಾನೂನು ರೂಪುಗೊಂಡು ಜಾರಿಯಾಗುವವರೆಗೂ ಎಲ್ಲ ಸರ್ಕಾರಿ ಸ್ಥಾನಮಾನಗಳಿಂದ ತಾವು ದೂರವಿರುವ ನಿರ್ಧಾರವನ್ನು ಎಲ್ಲ ಸಾಹಿತಿಗಳೂ ಒಮ್ಮತದಿಂದ ಕೈಗೊಂಡಲ್ಲಿ, ಅದು ನಿಜವಾದ ತಾತ್ವಿಕ ಬದ್ಧತೆಯಾಗುತ್ತದೆ.

ಅಚಲವಾದ ತಾತ್ವಿಕ ನಿಷ್ಠೆಯು ಎಂತಹ ಕೋಮುವಾದಿಯ ಮನಸ್ಸನ್ನೂ ಬದಲಾಯಿಸಬಲ್ಲದು. ಗಾಂಧೀಜಿ ಇಂತಹ ಹೃದಯ ಪರಿವರ್ತನೆಯನ್ನು ನಂಬಿದ್ದರು. ಸಾಹಿತಿಗಳು ಇದಾವುದನ್ನೂ ಮಾಡದೆ, ತಮ್ಮ ಅಧಿಕಾರವು ಪುಢಾರಿಗಳ ರಾಜಕೀಯ ಅಧಿಕಾರವನ್ನು ಅವಲಂಬಿಸಿದೆ ಎಂಬಂತೆ ವರ್ತಿಸಿದರೆ, ಜನರು ರಾಜಕಾರಣಿಗಳ ಮೇಲೆ ನಂಬಿಕೆ ಕಳೆದುಕೊಂಡಂತೆ ಇವರ ಮೇಲಿನ ನಂಬಿಕೆಯನ್ನೂ
ಕಳೆದುಕೊಳ್ಳುತ್ತಾರೆ.

ಡಾ. ಟಿ.ಎನ್.ವಾಸುದೇವಮೂರ್ತಿ, ಬೆಂಗಳೂರು