ಶೌಚಾಲಯ ಕಡ್ಡಾಯವಾಗಲಿ

ನಗರದ ಎಲ್ಲ ಹೋಟೆಲ್‌ಗಳಲ್ಲಿಯೂ ಕನಿಷ್ಠ ಒಂದು ಶೌಚಾಲಯವನ್ನಾದರೂ ಕಡ್ಡಾಯವಾಗಿ ನಿರ್ಮಿಸಬೇಕು ಎಂಬ ನಿಯಮವನ್ನು ಬಿಬಿಎಂಪಿ ರೂಪಿಸಬೇಕು. ಹೋಟೆಲ್‌ನವರೂ ಸ್ವಯಂಪ್ರೇರಣೆಯಿಂದ ಗ್ರಾಹಕರಿಗೆ ಈ ಸೌಲಭ್ಯ ಒದಗಿಸಲು ಮುಂದಾಗಬೇಕು. ಶೌಚಾಲಯ ನಿರ್ಮಿಸದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವ ಎಚ್ಚರಿಕೆಯನ್ನು ನೀಡುವುದೂ ಅಗತ್ಯವಾಗಿದೆ.

ಕೆ.ಎಸ್. ನಾಗರಾಜ್, ಬೆಂಗಳೂರು

***

ಪ್ರಯಾಣಿಕರಿಗೆ ಬರೆ

ರಾಜ್ಯ ಹೆದ್ದಾರಿಗಳಲ್ಲೂ ಪ್ರಯಾಣಿಕರಿಂದ ಟೋಲ್‌ ಸಂಗ್ರಹಿಸಲು ಸರ್ಕಾರ ಮುಂದಾಗಿದೆ ಎಂದು ವರದಿಯಾಗಿದೆ. ತೈಲ ಬೆಲೆ ಏರಿಕೆಯಿಂದ ಬೇಸತ್ತ ಜನರಿಗೆ ಈ ತೀರ್ಮಾನದಿಂದ ಗಾಯದ ಮೇಲೆ ಬರೆ ಎಳೆದಂತಾಗುವುದು. ಇದರಿಂದ ಸರ್ಕಾರವು ಜನರ ಶತ್ರುವಿನಂತೆ ಕೆಲಸ ಮಾಡಿದಂತಾಗುತ್ತದೆ. ಆದ್ದರಿಂದ ಈ ಯೋಚನೆಯನ್ನು ಕೈಬಿಡುವುದು ಲೇಸು.

ರವಿಕುಮಾರ ಮಠಪತಿ, ವಡಗಾಂವ, ಬೀದರ್‌