ನಕಲಿ ವೈದ್ಯರ ಹಾವಳಿ ತಡೆಯಲು ಸರ್ಕಾರ ಕಠಿಣ ಕಾಯ್ದೆ ತರಲು ಹೊರಟಿರುವುದು ಸ್ವಾಗತಾರ್ಹ. ಶಿಕ್ಷೆಯನ್ನು ಮೂರು ವಿಭಾಗವಾಗಿ ವಿಂಗಡಿಸಿರುವುದೇನೋ ಸರಿ. ಇಲ್ಲಿ ಯಾರು ನಕಲಿ ವೈದ್ಯರೆಂದು ಸರ್ಕಾರವೇ ನಿರ್ಧರಿಸಬೇಕು. ಯಾವುದೇ ವಿದ್ಯಾರ್ಹತೆಯಿಲ್ಲದೆಯೂ ಇನ್ನೊಬ್ಬರಿಂದ ಕಲಿತು ರೋಗಿಯನ್ನು ಪರೀಕ್ಷಿಸುವ ಮತ್ತು ಒಂದು ವೈದ್ಯ ಪದ್ಧತಿ ವ್ಯಾಸಂಗ ಮಾಡಿ ಇನ್ನೊಂದು ಪದ್ಧತಿಯಲ್ಲಿ ಚಿಕಿತ್ಸೆ ನೀಡುವವರನ್ನು ನಕಲಿ ಎನ್ನಬಹುದಲ್ಲವೇ? ಬೆಂಗಳೂರಿನಲ್ಲಂತೂ ನಕಲಿ ವೈದ್ಯರನ್ನು ಪತ್ತೆ ಮಾಡುವುದು ಕಷ್ಟದ ಕೆಲಸ.
ಹಳ್ಳಿಗಳಲ್ಲೂ ನಕಲಿ ವೈದ್ಯರ ಹಾವಳಿ ಜಾಸ್ತಿ. ಸರ್ಕಾರ ಕಾಯ್ದೆಗೆ ತಿದ್ದು ಪಡಿ ತರುವುದರ ಜೊತೆಗೆ ನಕಲಿ ವೈದ್ಯರನ್ನು ಪತ್ತೆ ಮಾಡಲು ದಕ್ಷ ತಂಡ ರಚಿಸಬೇಕು. ತಂಡದಲ್ಲಿರುವವರೇ ಆಮಿಷಗಳಿಗೆ ಬಲಿಯಾಗಬಹುದು. ತಂಡದಲ್ಲಿ ವೈದ್ಯರನ್ನು ಮಾತ್ರ ಸದಸ್ಯರನ್ನಾಗಿ ಮಾಡುವ ಬದಲು ಕಾನೂನು ತಜ್ಞರು, ಪೊಲೀಸ್ ಅಧಿಕಾರಿಗಳು, ಸಾಮಾಜಿಕ ಕಾರ್ಯಕರ್ತರನ್ನು ಸೇರಿಸಿಕೊಳ್ಳಬೇಕು.
ಜನಸಾಮಾನ್ಯರಿಗೆ ನಕಲಿ ವೈದ್ಯರ ಬಗ್ಗೆ ಅರಿವು ಮೂಡಿಸುವಂತಹ ಕಾರ್ಯಕ್ರಮಗಳನ್ನು ಸರ್ಕಾರ ಹಮ್ಮಿಕೊಳ್ಳಲಿ. ಹಾಗೆಯೇ ಅಸಲಿ ವೈದ್ಯರು ದಿಢೀರ್ ಶ್ರೀಮಂತರಾಗಲು ತಟ್ಟೆಗಟ್ಟಲೆ ನಕಲಿ ಔಷಧಿಗಳನ್ನು ಬರೆಯುವುದನ್ನು ತಪ್ಪಿಸಲೂ ಕಾನೂನು ರೂಪಿಸಿದರೆ ಒಳ್ಳೆಯದು.