2011 ವಿಶ್ವಕಪ್: ಸಚಿನ್ ಸಿಕ್ಸರ್; ವೀರೂ–ವಿರಾಟ್ ದರ್ಬಾರ್!

ಗುರುವಾರ , ಜೂನ್ 27, 2019
29 °C

2011 ವಿಶ್ವಕಪ್: ಸಚಿನ್ ಸಿಕ್ಸರ್; ವೀರೂ–ವಿರಾಟ್ ದರ್ಬಾರ್!

Published:
Updated:
Prajavani

ಭಾರತದ ಸಚಿನ್ ತೆಂಡೂಲ್ಕರ್ ಅವರ ದಾಖಲೆಗಳ ಕಿರೀಟಕ್ಕೆ ಮತ್ತೊಂದು ರತ್ನ ಸೇರಿದ ಹರ್ಷ. ಆರು ವಿಶ್ವಕಪ್ ಟೂರ್ನಿಗಳಲ್ಲಿ ಆಡಿದ ಭಾರತದ ಆಟಗಾರ ಮತ್ತು ವಿಶ್ವದ ಎರಡನೇ ಆಟಗಾರನಾದರು. ಪಾಕಿಸ್ತಾನ ತಂಡದ ಜಾವೇದ್ ಮಿಯಾಂದಾದ್ ( 1975, 1979, 1983, 1987, 1992 ಮತ್ತು 1996) ಅವರ ದಾಖಲೆಯನ್ನು ಸರಿಗಟ್ಟಿದರು. ಸಚಿನ್ 1992, 1996, 1999, 2003, 2007 ಮತ್ತು 2011ರಲ್ಲಿ ಆಡಿದ ಸಾಧನೆ ಮಾಡಿದರು. ಮೊದಲ ಬಾರಿಗೆ ವಿಶ್ವಕಪ್ ಟೂರ್ನಿಯ ಆಯೋಜನೆಯಲ್ಲಿ ಸಹಭಾಗಿಯಾಗಿದ್ದ ಬಾಂಗ್ಲಾದೇಶವು ಉದ್ಘಾಟನೆ ಸಮಾರಂಭ ಮತ್ತು ಪಂದ್ಯವನ್ನು ಸಂಘಟಿಸಿ ಮೆಚ್ಚುಗೆಗೆ ಪಾತ್ರವಾಯಿತು.

***

*  ಫೆಬ್ರುವರಿ 19ರಂದು ಢಾಕಾದ ಶೇರ್‌ ಎ ಬಾಂಗ್ಲಾ ಕ್ರೀಡಾಂಗಣದಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಭಾರತ ಮತ್ತು ಬಾಂಗ್ಲಾ ತಂಡಗಳು ಮುಖಾಮುಖಿಯಾದವು. ಪಂದ್ಯಕ್ಕೂ ಮುನ್ನ ಅಭೂತಪೂರ್ವ ಉದ್ಘಾಟನೆ ಸಮಾರಂಭ ಎಲ್ಲರ ಮನದಲ್ಲಿ ಅಚ್ಚೊತ್ತಿತ್ತು. ಟಾಸ್ ಗೆದ್ದ ಬಾಂಗ್ಲಾ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು.

*ಆರಂಭಿಕ ಜೋಡಿ ಸಚಿನ್ ತೆಂಡೂಲ್ಕರ್–ವೀರೇಂದ್ರ ಸೆಹ್ವಾಗ್  ಮೊದಲ ವಿಕೆಟ್ ಜೊತೆಯಾಟದಲ್ಲಿ 69 ರನ್ (10.5 ಓವರ್‌) ಕಲೆಹಾಕಿದರು. ಅದರಲ್ಲೂ ವೀರೂ ಆರ್ಭಟ ಮೇರೆ ಮೀರಿತ್ತು.  ಸಚಿನ್(28) ರನ್‌ಔಟ್ ಆದರು. ಕ್ರೀಸ್‌ಗೆ ಬಂದ ಎಡಗೈ ಬ್ಯಾಟ್ಸ್‌ಮನ್ ಗೌತಮ್ ಗಂಭೀರ್ (39 ರನ್) ಅವರು ವೀರೂ ಜೊತೆಗೆ ಎರಡನೇ ವಿಕೆಟ್ ಜೊತೆಯಾಟದಲ್ಲಿ 83 ರನ್‌ಗಳನ್ನು ಪೇರಿಸಿದರು. ಗಂಭೀರ್ ಔಟಾದಾಗ ಬಾಂಗ್ಲಾ ಆಟಗಾರರು ಸಂಭ್ರಮಿಸಿದರು. ನಂತರ ಆತಿಥೆಯರಿಗೆ ಸಂತಸಪಡುವ ಅವಕಾಶ ಸಿಗಲಿಲ್ಲ!

* ಸಿಡಿಲಮರಿ ವೀರೂ ಜೊತೆಗೂಡಿದ ವಿರಾಟ್ ಕೊಹ್ಲಿ ಗುಡುಗಿದರು. ಇವರಿಬ್ಬರ ಜೊತೆಯಾಟದ ಮಿಂಚಿನಾಟ ಕಣ್ಣು ಕೋರೈಸಿತು. ದ್ವಿಶತಕದತ್ತ ಹೆಜ್ಜೆ ಹಾಕಿದ್ದ ವೀರೂ (175; 140ಎಸೆತ, 14ಬೌಂಡರಿ, 5ಸಿಕ್ಸರ್) ಅಬ್ಬರಕ್ಕೆ ಬೌಲರ್‌ಗಳು ಬಸವಳಿದರು. ಅದರೆ ಅವರು 48ನೇ ಓವರ್‌ನಲ್ಲಿ ಔಟಾದರು.

* ವಿಶ್ವಕಪ್ ಟೂರ್ನಿಯಲ್ಲಿ ಮೊದಲ ಬಾರಿಗೆ ಆಡಿದ ವಿರಾಟ್ ಕೂಡ ಶತಕ (ಅಜೇಯ 100; 83ಎಸೆತ, 8ಬೌಂಡರಿ, 2ಸಿಕ್ಸರ್) ಬಾರಿಸಿದರು.

* ಭಾರತ ತಂಡವು 50 ಓವರ್‌ಗಳಲ್ಲಿ 4 ವಿಕೆಟ್‌ಗಳಿಗೆ 370 ರನ್‌ ಗಳಿಸಿತು. ಗುರಿ ಬೆನ್ನಟ್ಟಿದ ಬಾಂಗ್ಲಾ ತಂಡದ ಇಮಾಮ್ ಇಕ್ಬಾಲ್ (70 ರನ್), ಶಕೀಬ್ ಅಲ್ ಹಸನ್ (55 ರನ್) ಅರ್ಧಶತಕ ಹೊಡೆದರು.  ಭಾರತದ ಮಧ್ಯಮವೇಗಿ ಮುನಾಫ್ ಪಟೇಲ್ ನಾಲ್ಕು ವಿಕೆಟ್ ಗಳಿಸಿದರು. 50 ಓವರ್‌ಗಳಲ್ಲಿ  9 ವಿಕೆಟ್‌ಗಳಿಗೆ 283 ರನ್‌ಗಳನ್ನು ಗಳಿಸಿತು. 87 ರನ್‌ಗಳಿಂದ ಸೋತಿತು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 3

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !