ಟಿ20 ವಿಶ್ವಕಪ್‌ನಲ್ಲಿ ಎಬಿಡಿ ಮರಳುವವರಿದ್ದರು: ಡಿಕಾಕ್

ಇದೇ ಅಕ್ಟೋಬರ್–ನವೆಂಬರ್‌ನಲ್ಲಿ ಆಸ್ಟ್ರೇಲಿಯಾದ ಆತಿಥ್ಯದಲ್ಲಿ ಟೂರ್ನಿ ನಡೆಯಬೇಕಿತ್ತು. ಕೋವಿಡ್ –19 ಹಾವಳಿಯ ಕಾರಣ ಮುಂದೂಡಲಾಗಿದೆ. ಎಬಿಡಿ 2018ರಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು. ಅದರ ನಂತರ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಆರ್‌ಸಿಬಿಯಲ್ಲಿ ಮಾತ್ರ ಆಡಿದ್ದರು. ಅವರು ತಮ್ಮ ರಾಷ್ಟ್ರದ ತಂಡಕ್ಕೆ ಮರಳುವ ಕುರಿತ ಮಾತುಗಳು ಹರಿದಾಡಿದ್ದವು. ಆದರೆ ಸ್ವತಃ ಅವರೇ ಅವುಗಳನ್ನು ಅಲ್ಲಗಳೆದಿದ್ದರು.

’ಅವರು ಖಂಡಿತವಾಗಿಯೂ ಕಣಕ್ಕೆ ಇಳಿಯುತ್ತಿದ್ದರು. ಎಬಿಡಿಯಂತಹ ಆಟಗಾರ ತಂಡದಲ್ಲಿರಲೇಬೇಕು ಎಂಬುದು ನನ್ನ ಅಪೇಕ್ಷೆಯಾಗಿತ್ತು‘ ಎಂದು ಡಿಕಾಕ್ ಸ್ಟಾರ್ ಸ್ಪೋರ್ಟ್ಸ್‌ ಕಾರ್ಯಕ್ರಮದಲ್ಲಿ ಹೇಳಿದ್ದಾರೆ.

’ಎಬಿಡಿ ಅವರಂತಹ ಆಟಗಾರನನ್ನು ಯಾವ ತಂಡವೂ ಬೇಡ ಎನ್ನಲು ಸಾಧ್ಯವೇ ಇಲ್ಲ. ಆದ್ದರಿಂದಲೇ ನಮಗೂ ಅವರು ಆಡಲೇ ಬೇಕು ಎಂಬ ಅದಮ್ಯ ಆಸೆಯಿತ್ತು. ಆದರೆ ಈಗ ಟಿ20 ವಿಶ್ವಕಪ್ ಮುಂದೆ ಯಾವಾಗ ನಡೆಯಲಿದೆಯೋ ನೋಡಬೇಕು‘ ಎಂದರು.

’ನಾನು ಗ್ರೆಮ್ ಸ್ಮಿತ್, ಬೌಷ್ ಮತ್ತು ಫಾಫ್ ಡು ಪ್ಲೆಸಿಯವರೊಂದಿಗೆ ಈ ಕುರಿತು ಮಾತನಾಡಿದ್ದೇನೆ. ಅವರಿಗೂ ಎಬಿಡಿ ತಂಡಕ್ಕೆ ಮರಳಬೇಕು ಎಂಬ ಅಪೇಕ್ಷೆ ಇದೆ. ದಾರಿ ಇನ್ನೂ ಬಹಳ ದೂರವಿದೆ. ಐಪಿಎಲ್ ಕೂಡ ನಡೆಯಲಿದೆ. ಅದರಲ್ಲಿ ನಾನೂ ಕೂಡ ಆಡಬೇಕು. ಅಷ್ಟರಲ್ಲಿ ನಾನು ಲಯಕ್ಕೆ ಮರಳುವುದು ಅವಶ್ಯಕ‘ ಎಂದು ಡಿಕಾಕ್ ಹೇಳಿದ್ದಾರೆ.