ಹ್ಯಾಮಿಲ್ಟನ್‌, ನ್ಯೂಜಿಲೆಂಡ್‌: ಆತಿಥೇಯ ಕಿವೀಸ್‌ ವೇಗಿಗಳಾದ ಟಿಮ್‌ ಸೌಥಿ ಮತ್ತು ಮ್ಯಾಟ್‌ ಹೆನ್ರಿ, ಎರಡನೇ ದಿನದಾಟದ ಕೊನೆಯ ಒಂದು ಗಂಟೆಯ ಅವಧಿಯಲ್ಲಿ ಇಂಗ್ಲೆಂಡ್‌ ಆಟಗಾರರನ್ನು ಕಾಡಿದರು. ಹ್ಯಾಮಿಲ್ಟನ್‌ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್‌ನಲ್ಲಿ ಶನಿವಾರ ನ್ಯೂಜಿಲೆಂಡ್‌ನ 375 ರನ್‌ಗಳಿಗೆ ಉತ್ತರವಾಗಿ ಇಂಗ್ಲೆಂಡ್‌ 2 ವಿಕೆಟ್‌ಗೆ 39 ರನ್‌ ಗಳಿಸಿ ಪರದಾಡುತ್ತಿದೆ.
24 ರನ್‌ ಗಳಿಸಿ ಅಜೇಯರಾಗಿ ಉಳಿದಿರುವ ಆರಂಭ ಆಟಗಾರ ರೋರಿ ಬರ್ನ್ಸ್‌ ಎರಡು ಜೀವದಾನ ಪಡೆದಿದ್ದಾರೆ. ಜೋ ರೂಟ್‌ (ಔಟಾಗದೇ 6) ಕೂಡ ಲಯದಲ್ಲಿದ್ದಂತೆ ಕಾಣಲಿಲ್ಲ.
ಸೌಥಿ ಬೌಲಿಂಗ್‌ನಲ್ಲಿ ಡಾಮ್‌ ಸಿಬ್ಲಿ ಅವರ ಹೆಲ್ಮೆಟ್‌ಗೆ ಚೆಂಡು ಜೋರಾಗಿ ಬಡಿಯಿತು. ನಂತರ ಸೌಥಿ ಬೌಲಿಂಗ್‌ನಲ್ಲೇ ಎಲ್‌ಬಿಡಬ್ಲ್ಯು ಆದರು. ಜೊ ಡೆನ್ಲಿ, ಹೆನ್ರಿ ಬೌಲಿಂಗ್‌ನಲ್ಲಿ ವಿಕೆಟ್‌ ಕೀಪರ್‌ ವಾಟ್ಲಿಂಗ್‌ಗೆ ಕ್ಯಾಚಿತ್ತರು.
