ಕಿಂಬರ್ಲಿ: ಅಫ್ಗಾನಿಸ್ತಾನ ತಂಡದ ಸ್ಪಿನ್ನರ್ ಶಫಿಕುಲ್ಲಾ ಗಫಾರಿ ಅವರು ‘ವಜ್ರಗಳ ನಗರಿ’ಯಲ್ಲಿ ಶುಕ್ರವಾರ ಪ್ರಜ್ವಲಿಸಿದರು.
ಗಫಾರಿ (15ಕ್ಕೆ6) ಅವರ ಅಮೋಘ ಬೌಲಿಂಗ್ ನೆರವಿನಿಂದ ಅಫ್ಗಾನಿಸ್ತಾನ ತಂಡವು 19 ವರ್ಷದೊಳಗಿನವರ ಏಕದಿನ ವಿಶ್ವಕಪ್ನಲ್ಲಿ ಶುಭಾರಂಭ ಮಾಡಿತು.
ಡೈಮಂಡ್ ಓವಲ್ನಲ್ಲಿ ನಡೆದ ‘ಡಿ’ ಗುಂಪಿನ ಹಣಾಹಣಿಯಲ್ಲಿ ಫರ್ಹಾನ್ ಜಾಕೀಲ್ ನೇತೃತ್ವದ ಅಫ್ಗಾನ್ ತಂಡ 7 ವಿಕೆಟ್ಗಳಿಂದ ಆತಿಥೇಯ ದಕ್ಷಿಣ ಆಫ್ರಿಕಾವನ್ನು ಪರಾಭವಗೊಳಿಸಿತು.
ಮೊದಲು ಬ್ಯಾಟ್ ಮಾಡಿದ ಬ್ರೈಸ್ ಪಾರ್ಸನ್ಸ್ ಸಾರಥ್ಯದ ಆತಿಥೇಯ ತಂಡ 29.1 ಓವರ್ಗಳಲ್ಲಿ 129ರನ್ಗಳಿಗೆ ಆಲೌಟ್ ಆಯಿತು. ಈ ತಂಡದ ಮೂರು ಮಂದಿ ಶೂನ್ಯಕ್ಕೆ ಔಟಾದರೆ, ನಾಲ್ಕು ಮಂದಿ ಒಂದಂಕಿ ಮೊತ್ತ ಗಳಿಸಲಷ್ಟೇ ಶಕ್ತರಾದರು.
ಅಫ್ಗಾನಿಸ್ತಾನ 25 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಗುರಿ ತಲುಪಿತು. ಈ ತಂಡದ ಇಬ್ರಾಹಿಂ ಜದ್ರಾನ್ (52; 72ಎ, 8ಬೌಂ) ಮತ್ತು ಇಮ್ರಾನ್ (57; 48ಎ, 9ಬೌಂ) ಅರ್ಧಶತಕ ಬಾರಿಸಿ ಗಮನ ಸೆಳೆದರು.