ಐರ್ಲೆಂಡ್ ತಂಡಕ್ಕೆ 214 ರನ್‌ಗಳ ಗೆಲುವಿನ ಗುರಿ

ಡಬ್ಲಿನ್: ಕನ್ನಡಿಗ ಕೆ.ಎಲ್. ರಾಹುಲ್ (70; 36ಎ, 3ಬೌಂ, 6ಸಿ) ಮತ್ತು ಸುರೇಶ್ ರೈನಾ (66; 41ಎ, 5ಬೌಂ, 3ಸಿ) ಅವರಿಬ್ಬರ ಅಬ್ಬರದ ಆಟದ ನೆರವಿನಿಂದ ಭಾರತ ಬೃಹತ್ ಮೊತ್ತ ಪೇರಿಸಿದೆ. 

ವಿಲೇಜ್ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಎರಡನೇ ಟ್ವೆಂಟಿ–20 ಪಂದ್ಯದಲ್ಲಿ ಭಾರತ ತಂಡ 20 ಓವರ್‌ಗಳಲ್ಲಿ 4 ವಿಕೆಟ್‌ಗಳಿಗೆ 214 ರನ್‌ ಗಳಿಸಿತು.

ಸರಣಿಯ ಮೊದಲ ಪಂದ್ಯದಲ್ಲಿ ರಾಹುಲ್‌ಗೆ ಆಡುವ ಅವಕಾಶ ಸಿಕ್ಕಿರಲಿಲ್ಲ. ಈ ಪಂದ್ಯದಲ್ಲಿ ಆರಂಭಿಕ ಆಟಗಾರ ಶಿಖರ್ ಧವನ್ ಅವರಿಗೆ ವಿಶ್ರಾಂತಿ ನೀಡಿ ರಾಹುಲ್‌ ಅವರಿಗೆ ಅವಕಾಶ ನೀಡಲಾಯಿತು. ಇದರ ಸದುಪಯೋಗ ಪಡಿಸಿಕೊಂಡ ರಾಹುಲ್ 70 ರನ್‌ ಗಳಿಸಿದರು. ಸುರೇಶ್‌ ರೈನಾ 69 ರನ್‌ ಗಳಿಸಿದರು. ನಾಯಕ ವಿರಾಟ್ ಕೊಹ್ಲಿ ಇನಿಂಗ್ಸ್‌ ಆರಂಭಿಸಿದರು. ಆದರೆ ಅವರು ಕೇವಲ 9 ರನ್ ಗಳಿಸಿ ಔಟಾದರು. ಇದರಿಂದಾಗಿ ಅವರು ಟ್ವೆಂಟಿ–20 ಕ್ರಿಕೆಟ್‌ನಲ್ಲಿ ಎರಡು ಸಹಸ್ರ ರನ್‌ ಮುಟ್ಟಲಿಲ್ಲ. ಅದಕ್ಕಾಗಿ ಅವರಿಗೆ ಇನ್ನೂ ಎಂಟು ರನ್‌ಗಳು ಬೇಕು.

ವಿಕೆಟ್‌ಕೀಪರ್‌ ಮಹೇಂದ್ರಸಿಂಗ್ ದೋನಿ ಅವರೂ ವಿಶ್ರಾಂತಿ ಪಡೆದಿದ್ದರಿಂದ ದಿನೇಶ್ ಕಾರ್ತಿಕ್ ಅವಕಾಶ ಗಿಟ್ಟಿಸಿಕೊಂಡರು. ಮಧ್ಯಮವೇಗಿ ಸಿದ್ಧಾರ್ಥ್ ಕೌಲ್ ಪದಾರ್ಪಣೆ  ಮಾಡಿದರು.

ಸಂಕ್ಷಿಪ್ತ ಸ್ಕೋರು: ಭಾರತ: 20 ಓವರ್‌ಗಳಲ್ಲಿ 4 ವಿಕೆಟ್‌ಗಳಿಗೆ 213 (ಕೆ.ಎಲ್. ರಾಹುಲ್ 70, ವಿರಾಟ್ ಕೊಹ್ಲಿ 9, ಸುರೇಶ್ ರೈನಾ 69, ಕೆವಿನ್ ಓಬ್ರೇನ್ 12ಕ್ಕೆ2)