ಗಾಲ್: ನಾಯಕ ದಿಮುತ್‌ ಕರುಣರತ್ನೆ (86) ಮತ್ತು ಕುಶಾಲ್‌ ಮೆಂಡಿಸ್‌ (ಬ್ಯಾಟಿಂಗ್ 84) ಅವರ ಅರ್ಧಶತಕಗಳ ನೆರವಿನಿಂದ ಶ್ರೀಲಂಕಾ ತಂಡ, ಎರಡನೇ ಕ್ರಿಕೆಟ್‌ ಟೆಸ್ಟ್‌ನಲ್ಲಿ ಆಸ್ಟ್ರೇಲಿಯಾಕ್ಕೆ ದಿಟ್ಟ ಉತ್ತರ ನೀಡಿದೆ.
ಗಾಲ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದ ಎರಡನೇ ದಿನ ಶನಿವಾರದ ಆಟದ ಅಂತ್ಯಕ್ಕೆ ಶ್ರೀಲಂಕಾ, 2 ವಿಕೆಟ್‌ಗೆ 184 ರನ್‌ ಗಳಿಸಿದೆ. ಆಸ್ಟ್ರೇಲಿಯಾ ಮೊದಲ ಇನಿಂಗ್ಸ್‌ನಲ್ಲಿ 364 ರನ್‌ ಗಳಿಸಿತ್ತು.
ಆತಿಥೇಯ ತಂಡ ಪತುಮ್‌ ನಿಸ್ಸಾಂಕ (6) ಅವರನ್ನು ಬೇಗನೇ ಕಳೆದುಕೊಂಡಿತು. ಕರುಣರತ್ನೆ ಮತ್ತು ಮೆಂಡಿಸ್‌ ಎರಡನೇ ವಿಕೆಟ್‌ಗೆ 152 ರನ್‌ ಸೇರಿಸಿ ತಂಡಕ್ಕೆ ಆಸರೆಯಾದರು. ಕರುಣರತ್ನೆ ವಿಕೆಟ್ ಪಡೆದ ಮಿಚೆಲ್ ಸ್ವೆಪ್ಸನ್‌ ಈ ಜತೆಯಾಟ ಮುರಿದರು. 165 ಎಸೆತಗಳನ್ನು ಎದುರಿಸಿದ ಅವರು 10 ಬೌಂಡರಿ ಹೊಡೆದರು.
ಇದಕ್ಕೂ ಮುನ್ನ 5 ವಿಕೆಟ್‌ಗೆ 298 ರನ್‌ಗಳಿಂದ ದಿನದಾಟ ಮುಂದುವರಿಸಿದ ಆಸ್ಟ್ರೇಲಿಯಾ, ಪ್ರಭತ್ ಜಯಸೂರ್ಯ ಅವರ ಬಿಗುವಾದ ಬೌಲಿಂಗ್ ದಾಳಿಗೆ ನಲುಗಿ 364 ರನ್‌ಗಳಿಗೆ ಆಲೌಟಾಯಿತು. ಪ್ರಭತ್ 118 ರನ್‌ಗಳಿಗೆ 6 ವಿಕೆಟ್ ಪಡೆದರು.
ಸ್ಟೀವನ್‌ ಸ್ಮಿತ್ ಅವರು 145 ರನ್‌ ಗಳಿಸಿ (272 ಎ, 4X16) ಔಟಾಗದೆ ಉಳಿದರು. ಕೊನೆಯ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳಿಂದ ಅವರಿಗೆ ತಕ್ಕ ಸಾಥ್‌ ಸಿಗಲಿಲ್ಲ.
ಸಂಕ್ಷಿಪ್ತ ಸ್ಕೋರ್‌: ಮೊದಲ ಇನಿಂಗ್ಸ್‌ ಆಸ್ಟ್ರೇಲಿಯಾ 364 (110 ಓವರ್) ಮಾರ್ನಸ್‌ ಲಾಬುಶೇನ್ 104, ಸ್ಟೀವನ್‌ ಸ್ಮಿತ್ ಔಟಾಗದೆ 145, ಅಲೆಕ್ಸ್ ಕೇರಿ 28, ಪ್ರಭತ್ ಜಯಸೂರ್ಯ 118ಕ್ಕೆ 6, ಕಸುನ್‌ ರಜಿತ 70ಕ್ಕೆ 2
