ಐಸಿಸಿ ತಿಂಗಳ ಆಟಗಾರ್ತಿ: ಶಫಾಲಿ, ಸ್ನೇಹ್ ನಾಮನಿರ್ದೇಶನ

ದುಬೈ: ಇಂಗ್ಲೆಂಡ್ ಎದುರಿನ ಸರಣಿಯಲ್ಲಿ ಉತ್ತಮ ಸಾಮರ್ಥ್ಯ ತೋರುತ್ತಿರುವ ಭಾರತ ಮಹಿಳಾ ಕ್ರಿಕೆಟ್ ತಂಡದ ಶಫಾಲಿ ವರ್ಮಾ ಹಾಗೂ ಸ್ನೇಹ್‌ ರಾಣಾ ಅವರು ‘ಐಸಿಸಿಯ ತಿಂಗಳ ಆಟಗಾರ್ತಿ‘ ಪುರಸ್ಕಾರಕ್ಕೆ ನಾಮನಿರ್ದೇಶನಗೊಂಡಿದ್ದಾರೆ.

ಬ್ಯಾಟರ್‌ ಶಫಾಲಿ, ಆಲ್‌ರೌಂಡರ್‌ ಸ್ನೇಹ್ ಅವರಲ್ಲದೆ ಇಂಗ್ಲೆಂಡ್‌ನ ಎಡಗೈ ಸ್ಪಿನ್ನರ್‌ ಸೋಫಿ ಎಕ್ಲೆಸ್ಟೋನ್‌ ಕೂಡ ಈ ಪಟ್ಟಿಯಲ್ಲಿದ್ದಾರೆ.

‘ತಿಂಗಳ ಆಟಗಾರ’ ವಿಭಾಗಕ್ಕೆ ನ್ಯೂಜಿಲೆಂಡ್‌ ಬ್ಯಾಟ್ಸ್‌ಮನ್ ಡೆವೊನ್ ಕಾನ್ವೆ, ವೇಗಿ ಕೈಲ್ ಜೆಮಿಸನ್‌ ಮತ್ತು ದಕ್ಷಿಣ ಆಫ್ರಿಕಾದ ವಿಕೆಟ್‌ ಕೀಪರ್ ಕ್ವಿಂಟನ್ ಡಿಕಾಕ್ ಅವರನ್ನು ನಾಮನಿರ್ದೇಶನ ಮಾಡಲಾಗಿದೆ.

17 ವರ್ಷದ ಶಫಾಲಿ, ಇಂಗ್ಲೆಂಡ್ ಎದುರು ಟೆಸ್ಟ್‌ಗೆ ಪದಾರ್ಪಣೆ ಮಾಡಿದ್ದರು. ಬ್ರಿಸ್ಟಲ್‌ನಲ್ಲಿ ನಡೆದ ಈ ಪಂದ್ಯದ ಎರಡೂ ಇನಿಂಗ್ಸ್‌ಗಳಲ್ಲಿ ಕ್ರಮವಾಗಿ 96 ಮತ್ತು 63 ರನ್ ಗಳಿಸಿ ಪಂದ್ಯಶ್ರೇಷ್ಠ ಆಟಗಾರ್ತಿಯಾಗಿದ್ದರು. ಅದೇ ತಂಡದ ಎದುರಿನ ಎರಡು ಏಕದಿನ ಪಂದ್ಯಗಳಲ್ಲೂ ಉತ್ತಮವಾಗಿ ಬ್ಯಾಟ್ ಬೀಸಿದ್ದರು.

ಬ್ರಿಸ್ಟಲ್‌ ಟೆಸ್ಟ್ ಮೂಲಕವೇ ಮೊದಲ ಪಂದ್ಯವಾಡಿದ್ದ ಸ್ನೇಹ ಕೂಡ ಎರಡನೇ ಇನಿಂಗ್ಸ್‌ನಲ್ಲಿ (ಫಾಲೋ ಆನ್‌) ಅಜೇಯ 80 ರನ್‌ ಗಳಿಸುವ ಮೂಲಕ ಭಾರತ ತಂಡವನ್ನು ಸೋಲಿನ ಭೀತಿಯಿಂದ ಪಾರು ಮಾಡಿದ್ದರು. ಪಂದ್ಯದಲ್ಲಿ 131 ರನ್‌ ನೀಡಿ ನಾಲ್ಕು ವಿಕೆಟ್‌ಗಳನ್ನೂ ತಮ್ಮದಾಗಿಸಿಕೊಂಡಿದ್ದರು.