ಥಾಯ್ಲೆಂಡ್ ಎದುರು ಭಾರತ ಅಮೋಘ ಆಟ ಆಡಿತ್ತು. ಬಲಿಷ್ಠ ಆಕ್ರಮಣ ವಿಭಾಗವನ್ನು ಹೊಂದಿರುವ ಆ ತಂಡವನ್ನು ಕಟ್ಟಿಹಾಕುವಲ್ಲಿ ಯಶಸ್ವಿಯಾಗಿದ್ದ ಚೆಟ್ರಿ ಬಳಗ ಎದುರಾಳಿ ರಕ್ಷಣಾ ಕೋಟೆಯನ್ನು ಬೇಧಿಸುವಲ್ಲಿ ಯಶಸ್ವಿಯಾಗಿತ್ತು. ಕೆಲವು ಕಾಲದಿಂದ ಗೋಲು ಬರ ಅನುಭವಿಸಿದ್ದ ಸುನಿಲ್ ಚೆಟ್ರಿ ಮೊದಲ ಎರಡು ಗೋಲುಗಳನ್ನು ಗಳಿಸಿ ಮಿಂಚಿದ್ದರು. ಅನಿರುದ್ಧ ತಾಪ ಮಿಂಚಿನ ಆಟವಾಡಿ ಚೆಂಡನ್ನು ಗುರಿ ಮುಟ್ಟಿಸಿದ್ದರು. ಬದಲಿ ಆಟಗಾರನಾಗಿ ದ್ವಿತೀಯಾರ್ಧದಲ್ಲಿ ಕಣಕ್ಕೆ ಇಳಿದಿದ್ದ ಜೆಜೆ ಲಾಲ್ಫೆಕ್ಲುವಾ ಅಂಗಣಕ್ಕೆ ಬಂದ ಒಂದೇ ನಿಮಿಷದಲ್ಲಿ ಗೋಲು ಗಳಿಸಿ ಸಂಭ್ರಮಿಸಿದ್ದರು.