ಬೆಂಗಳೂರು: ರಾಜಶೇಖರ್ ಗಳಿಸಿದ ಎರಡು ಗೋಲುಗಳ ನೆರವಿನಿಂದ ಮುಸ್ಲಿಮ್ಸ್ ಹೀರೊಸ್ ಎಫ್ಸಿ ತಂಡವು ಬೆಂಗಳೂರು ಜಿಲ್ಲಾ ಫುಟ್ಬಾಲ್ ಸಂಸ್ಥೆ (ಬಿಡಿಎಫ್ಎ) ಆಶ್ರಯದ ‘ಸಿ’ ಡಿವಿಷನ್ ಲೀಗ್ನ ಪಂದ್ಯದಲ್ಲಿ ಗೆದ್ದಿದೆ.
ಅಶೋಕನಗರದಲ್ಲಿರುವ ಬೆಂಗಳೂರು ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಹೋರಾಟದಲ್ಲಿ ಹೀರೊಸ್ ಎಫ್ಸಿ 3–2 ಗೋಲುಗಳಿಂದ ಎಕ್ಸೆಲ್ಸಿಯರ್ ಎಫ್ಸಿ ತಂಡವನ್ನು ಮಣಿಸಿತು.
ಮುಸ್ಲಿಮ್ಸ್ ತಂಡದ ರಾಜಶೇಖರ್, ನಾಲ್ಕನೇ ನಿಮಿಷದಲ್ಲಿ ಸಿಕ್ಕ ಪೆನಾಲ್ಟಿ ಅವಕಾಶವನ್ನು ಗೋಲಾಗಿ ಪರಿವರ್ತಿಸಿದರು. ಏಳನೇ ನಿಮಿಷದಲ್ಲಿ ಗೋಲು ಹೊಡೆದ ನಸೀಮ್ 2–0 ಮುನ್ನಡೆಗೆ ಕಾರಣರಾದರು.
ಎಕ್ಸಲ್ಸಿಯರ್ ತಂಡದ ಯಾಸೀನ್ ಮತ್ತು ಜಾಸಿಮ್ ಕ್ರಮವಾಗಿ 20 ಮತ್ತು 21ನೇ ನಿಮಿಷಗಳಲ್ಲಿ ಚೆಂಡನ್ನು ಗುರಿ ಮುಟ್ಟಿಸಿದ್ದರಿಂದ ಪಂದ್ಯ 2–2 ಗೋಲುಗಳಿಂದ ಸಮಬಲವಾಯಿತು.
28ನೇ ನಿಮಿಷದಲ್ಲಿ ಮುಸ್ಲಿಮ್ಸ್ ತಂಡಕ್ಕೆ ಮತ್ತೊಂದು ಪೆನಾಲ್ಟಿ ಸಿಕ್ಕಿತು. ಈ ಅವಕಾಶದಲ್ಲಿ ರಾಜಶೇಖರ್ ಮತ್ತೊಮ್ಮೆ ಕಾಲ್ಚಳಕ ತೋರಿದರು.
ಬೆಂಗಳೂರು ರೆಡ್ಸ್ ಎಫ್ಸಿ ಮತ್ತು ಬಸವನಗುಡಿ ಎಫ್ಸಿ ನಡುವಣ ದಿನದ ಇನ್ನೊಂದು ಪಂದ್ಯ 1–1 ಗೋಲುಗಳಿಂದ ಸಮಬಲವಾಯಿತು.
ಬಸವನಗುಡಿ ತಂಡದ ಬಿ.ಎನ್.ಕಾರ್ತಿಕ್ 23ನೇ ನಿಮಿಷದಲ್ಲಿ ಗೋಲು ಹೊಡೆದರೆ, ರೆಡ್ಸ್ ತಂಡದ ಆದಿತ್ಯ 38ನೇ ನಿಮಿಷದಲ್ಲಿ ಚೆಂಡನ್ನು ಗುರಿ ತಲುಪಿಸಿದರು.