ಮಿನರ್ವ ಜೊತೆ ಡೆಲ್ಲಿ ಎಫ್‌ಸಿ ಒಪ್ಪಂದ

ನವದೆಹಲಿ: ರಾಷ್ಟ್ರ ರಾಜಧಾನಿ ಪ್ರದೇಶದಲ್ಲಿ ಫುಟ್‌ಬಾಲ್‌ ಕ್ರೀಡೆಯನ್ನು ಬೆಳೆಸುವ ಉದ್ದೇಶದೊಂದಿಗೆ ಮಿನರ್ವ ಎಫ್‌ಸಿ ಅಕಾಡೆಮಿಯು ಡೆಲ್ಲಿ ಎಫ್‌ಸಿ ಜೊತೆ ಒಪ್ಪಂದ ಮಾಡಿಕೊಂಡಿದೆ. ಅಕಾಡೆಮಿಯ ಮಾಲೀಕ ರಂಜಿತ್ ಬಜಾಜ್ ಈ ವಿಷಯ ತಿಳಿಸಿದ್ದು ಸ್ಥಳೀಯ ಆಟಗಾರರು, ಕೋಚ್‌ಗಳು, ಆಡಳಿತಗಾರರು ಮತ್ತು ಫುಟ್‌ಬಾಲ್‌ನಲ್ಲಿ ತೊಡಗಿಸಿಕೊಂಡಿರುವ ಇತರರ ಪ್ರತಿಭೆಯನ್ನು ಬೆಳೆಸುವುದು ಈ ಒಪ್ಪಂದದ ಉದ್ದೇಶ ಎಂದು ವಿವರಿಸಿದ್ದಾರೆ.

‘ಕಳೆದ ಬಾರಿ ಡೆಲ್ಲಿ ಲೀಗ್‌ನಲ್ಲಿ ಮೂರನೇ ಸ್ಥಾನ ಗಳಿಸಿರುವ ಡೆಲ್ಲಿ ಎಫ್‌ಸಿ ಜೊತೆಗಿನ ಈ ಸಂಬಂಧವು ದೆಹಲಿ ಭಾಗದಲ್ಲಿ ನಮ್ಮ ಅಸ್ತಿತ್ವ ತೋರಿಸಲು ನೆರವಾಗುವ ಭರವಸೆ ಇದೆ’ ಎಂದು ಅವರು ಅಭಿಪ್ರಾಯಪಟ್ಟರು.

‘ದೆಹಲಿ ನಗರವು ಕಳೆದ ಕೆಲವು ವರ್ಷಗಳಲ್ಲಿ ರಾಷ್ಟ್ರೀಯ ತಂಡಕ್ಕೆ ಕೆಲವು ಅತ್ಯುತ್ತಮ ಆಟಗಾರರನ್ನು ಕಾಣಿಕೆಯಾಗಿ ನೀಡಿದೆ. ದುರದೃಷ್ಟವಶಾತ್ ಈ ಆಟಗಾರರು ದೇಶಿ ಫುಟ್‌ಬಾಲ್‌ನಲ್ಲಿ ಇತರ ನಗರಗಳಲ್ಲಿ ಅಥವಾ ಬೇರೆ ಕಡೆಯ ಕ್ಲಬ್‌ಗಳಲ್ಲಿ ಆಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಅವರಿಗೆ ಇಲ್ಲೇ ಅವಕಾಶ ಕೊಡಿಸುವುದರೊಂದಿಗೆ ಇನ್ನಷ್ಟು ಹೊಸ ಪ್ರತಿಭೆಗಳನ್ನು ಬೆಳಕಿಗೆ ತರಲು ಪ್ರಯತ್ನಿಸಲಾಗುವುದು’ ಎಂದು ಅವರು ಹೇಳಿದರು.