ವಿಶ್ವ ಜೂನಿಯರ್‌ ಬಾಕ್ಸಿಂಗ್‌: ಹಾರ್ದಿಕ್‌, ಪ್ರಾಚಿಗೆ ಬೆಳ್ಳಿ

ಏಷ್ಯನ್ ಜೂನಿಯರ್ ಚಾಂಪಿಯನ್ ಹಾರ್ದಿಕ್ (80 ಕೆಜಿ) ಭಾನುವಾರ ನಡೆದ ರೋಚಕ ಪಂದ್ಯದಲ್ಲಿ ರಷ್ಯಾದ ಅಶುರೊವ್ ಬೈರಾಮ್‌ಖಾನ್ ಅವರಿಗೆ 2-3ರಿಂದ ಮಣಿದರು.

ಅಮಿಶಾ (54 ಕೆಜಿ) 0–5ರಿಂದ ಕಜಕಿಸ್ತಾನ್‌ನ ಅಯಾಜಾನ್ ಸೈಡಿಕ್‌ಗೆ ಮತ್ತು ಪ್ರಾಚಿ (80 ಕೆಜಿ) 0–5ರಿಂದ ಎರಡು ಬಾರಿ ಏಷ್ಯನ್ ಜೂನಿಯರ್ ಚಾಂಪಿಯನ್ ಉಜ್ಬೇಕಿಸ್ತಾನ್‌ನ ಸೊಬಿರಾಖೋನ್ ಶಖೋಬಿದ್ದಿನೋವಾ ವಿರುದ್ಧ ಪರಾಭವಗೊಂಡರು.

ಟೂರ್ನಿಯಲ್ಲಿ ಭಾರತದ ಬಾಕ್ಸರ್‌ಗಳು ಐದು ಕಂಚು ಸೇರಿದಂತೆ ಒಟ್ಟು 17 ಪದಕಗಳನ್ನು ಗೆದಿದ್ದಾರೆ.

ಪಾಯಲ್ (48 ಕೆಜಿ), ನಿಶಾ (52 ಕೆಜಿ), ವಿನಿ (57 ಕೆಜಿ), ಸೃಷ್ಟಿ (63 ಕೆಜಿ), ಆಕಾಂಕ್ಷಾ (70 ಕೆಜಿ), ಮೇಘಾ (80 ಕೆಜಿ), ಜತಿನ್ (54 ಕೆಜಿ), ಸಾಹಿಲ್ (75 ಕೆಜಿ) ಮತ್ತು ಹೇಮಂತ್ (80+ ಕೆಜಿ) ಅವರು ತಮ್ಮ ವಿಭಾಗದಲ್ಲಿ ಫೈನಲ್‌ ಪ್ರವೇಶಿಸಿದ್ದು, ಸೋಮವಾರ ಚಿನ್ನದ ಪದಕಕ್ಕಾಗಿ ಹೋರಾಡಲಿದ್ದಾರೆ.

ನೇಹಾ (46 ಕೆಜಿ), ನಿಧಿ (66 ಕೆಜಿ), ಪರಿ (50 ಕೆಜಿ), ಕೃತಿಕಾ (75 ಕೆಜಿ) ಮತ್ತು ಸಿಕಂದರ್ (48 ಕೆಜಿ) ಅವರು ಸೆಮಿಫೈನಲ್‌ನಲ್ಲಿ ಅಭಿಯಾನ ಮುಗಿಸಿ ಕಂಚಿನ ಪದಕ ಗೆದ್ದುಕೊಂಡರು.