ಬೆಂಗಳೂರು: ಗಣೇಶ್‌ ಮತ್ತು ಪ್ರದ್ಯುಮ್ನ ಅವರ ಆಟದ ಬಲದಿಂದ ಮಂಗಳೂರು ಬಿ.ಸಿ ತಂಡವು ಪ್ರೊ.ಎನ್‌.ಸಿ. ಪರಪ್ಪ ಸ್ಮಾರಕ ಎವರ್ ರೋಲಿಂಗ್ ಟ್ರೋಫಿಯ ರಾಜ್ಯ ‘ಎ’ ಡಿವಿಷನ್‌ ಬ್ಯಾಸ್ಕೆಟ್‌ಬಾಲ್‌ ಚಾಂಪಿಯನ್‌ಷಿಪ್‌ ಪಂದ್ಯದಲ್ಲಿ 74–63ರಿಂದ ಡಿವೈಇಎಸ್‌ ಬೆಂಗಳೂರು ತಂಡವನ್ನು ಮಣಿಸಿತು.
ಕಂಠೀರವ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಮಂಗಳೂರು ತಂಡ 11 ಪಾಯಿಂಟ್‌ಗಳ ಅಂತರದಿಂದ ಜಯ ಸಾಧಿಸಿತು. ಮಧ್ಯಂತರದ ವರೆಗೆ ಸಮಬಲದ (35–35) ಹೋರಾಟ ನಡೆಸಿದ ಮಂಗಳೂರು ತಂಡದವರು ನಂತರ ಪುಟಿದೆದ್ದರು. ತಂಡದ ಗಣೇಶ್‌ (18), ಪ್ರದ್ಯುಮ್ನ (17) ಮಿಂಚಿದರು. ಡಿವೈಇಎಸ್‌ ತಂಡದ ಮನೋಜ್‌ (43) ಗಮನ ಸೆಳೆದರು.
