ಸ್ಕ್ವಾಷ್‌ ರ್ಯಾಂಕಿಂಗ್‌: ಜೋಷ್ನಾ ಚಿಣ್ಣಪ್ಪಗೆ ಬಡ್ತಿ

ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದ ಈಜಿಪ್ತ್‌ ದೇಶದ ರನೀಮ್ ಎಲ್ ವೆಲಿಲಿ ಅವರು ಈಚೆಗೆ ನಿವೃತ್ತಿ ಘೋಷಿಸಿದ್ದರು. ಅದರಿಂದಾಗಿ ಜೋಷ್ನಾ ಅವರಿಗೆ ಹತ್ತನೇ ಸ್ಥಾನ ಲಭಿಸಿದೆ. ತಮ್ಮ ವೃತ್ತಿ ಜೀವನದಲ್ಲಿ ಅವರು 2016ರಲ್ಲಿ ಇಂತಹ ಸಾಧನೆ ಮಾಡಿದ್ದರು. ಇದು ಎರಡನೇ ಸಲವಾಗಿದೆ. ಭಾರತದ ಮತ್ತೊಬ್ಬ ಆಟಗಾರ್ತಿ ದೀಪಿಕಾ ಪಳ್ಳಿಕಲ್ ಈ ಸಾಧನೆಯನ್ನು ಮಾಡಿದ್ದರು.

ಮಾರ್ಚ್‌ನಿಂದ ಅವರು ಯಾವುದೇ ಟೂರ್ನಿಯಲ್ಲಿ ಆಡಲಿಲ್ಲ. ಕೋವಿಡ್ –19 ಹಾವಳಿಯಿಂದಾಗಿ ಸ್ಕ್ವಾಷ್ ಚಟುವಟಿಕೆಗಳು ಸ್ಥಗಿತವಾಗಿರುವುದು ಇದಕ್ಕೆ ಕಾರಣ. ಆಗಸ್ಟ್‌ ಅಂತ್ಯದವರೆಗೂ ಯಾವುದೇ ಚಟುವಟಿಕೆ ಆರಂಭವಾಗುವುದಿಲ್ಲ ಎಂದು ಪಿಎಸ್‌ಎ ತಿಳಿಸಿದೆ.

ಈಜಿಪ್ತ್ ದೇಶದ ನೌರನ್ ಗೋಹರ್ ಅವರು ಅಗ್ರಸ್ಥಾನ ಪಡೆದುಕೊಂಡಿದ್ದಾರೆ. ಸುಮಾರು 19 ತಿಂಗಳುಗಳ ಕಾಲ ಮೊದಲ ಸ್ಥಾನದಲ್ಲಿದ್ದ ರನೀಮ್ ಹೋದ ತಿಂಗಳು ನಿವೃತ್ತಿ ನಿರ್ಧಾರವನ್ನು ಪ್ರಕಟಿಸಿದ್ದರು.

ಪುರುಷರ ವಿಭಾಗದಲ್ಲಿ ಭಾರತದ ಸೌರವ್ ಘೋಷಾಲ್ 13ನೇ ಸ್ಥಾನ ಪಡೆದುಕೊಂಡಿದ್ದಾರೆ.