ನವದೆಹಲಿ: ವಿಶ್ವ ಬಾಕ್ಸಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಭಾರತದ ಲವ್ಲಿನಾ ಬೊರ್ಗೊಹೈನ್‌ ಅಭಿಯಾನ ಅಂತ್ಯವಾಗಿದೆ. ಪೂಜಾ ರಾಣಿ ಕ್ವಾರ್ಟರ್‌ಫೈನಲ್‌ಗೆ ಮುನ್ನಡೆದಿದ್ದಾರೆ.
ಟರ್ಕಿಯ ಇಸ್ತಾಂಬುಲ್‌ನಲ್ಲಿ ನಡೆಯುತ್ತಿರುವ ಚಾಂಪಿಯನ್‌ಷಿಪ್‌ನ 70 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿದ್ದ, ಟೋಕಿಯೊ ಒಲಿಂಪಿಕ್ಸ್ ಕಂಚಿನ ಪದಕ ವಿಜೇತೆ ಲವ್ಲಿನಾ ಪ್ರೀಕ್ವಾರ್ಟರ್‌ಫೈನಲ್‌ನಲ್ಲಿ ಸೋತರು. ಅವರ ವಿರುದ್ಧ ಸ್ಪರ್ಧಿಸಿದ್ದ ಫೇರ್ ಚಾನ್ಸ್ ಟೀಮ್‌ನ(ನಿರಾಶ್ರಿತ ಅಥ್ಲೀಟ್‌ಗಳ ತಂಡ) ಸಿಂಡಿ ಎನ್‌ಗಾಂಬಾ 4–1ರಿಂದ ಬೌಟ್‌ ಜಯಿಸಿದರು.
ಎರಡು ಬಾರಿಯ ಏಷ್ಯಾ ಚಾಂಪಿಯನ್‌ ಪೂಜಾ 81 ಕೆಜಿ ವಿಭಾಗದ ಪ್ರೀಕ್ವಾರ್ಟರ್‌ನಲ್ಲಿ 5–0ಯಿಂದ ಹಂಗರಿಯ ಟಿಮಿಯಾ ನ್ಯಾಗಿ ಎದುರು ಗೆಲುವು ಸಾಧಿಸಿದರು.
ಸೋಮವಾರ ನಡೆಯುವ ಎಂಟರಘಟ್ಟದ ಬೌಟ್‌ನಲ್ಲಿ ಪೂಜಾ, ಆಸ್ಟ್ರೇಲಿಯಾದ ಜೆಸ್ಸಿಕಾ ಬ್ಯಾಗ್ಲಿ ಅವರನ್ನು ಎದುರಿಸುವರು.
