ಗುಜರಾತ್, ಮಹಾರಾಷ್ಟ್ರ ತಂಡಗಳಿಗೆ ಗೆಲುವು

ಕಂಠೀರವ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಟೂರ್ನಿಯ ಎರಡನೇ ದಿನ ಲೀಗ್ ಹಂತದಲ್ಲಿ ಗುಜರಾತ್ ತಂಡವು25–21, 25–12, 25–19ರಿಂದ ತೆಲಂಗಾಣ ತಂಡಕ್ಕೆ ಸೋಲುಣಿಸಿತು. ಮೊದಲ ಗೇಮ್‌ನಲ್ಲಿ ತೆಲಂಗಾಣ ಸ್ವಲ್ಪ ಪೈಪೋಟಿ ನೀಡಿತು. ಆದರೆ ಎರಡನೇ ಗೇಮ್‌ನಲ್ಲಿ ಗುಜರಾತ್‌ ಸಂಪೂರ್ಣ ಮೇಲುಗೈ ಸಾಧಿಸಿತು. ನಿರ್ಣಾಯಕ ಮೂರನೇ ಗೇಮ್‌ನಲ್ಲಿ ತೆಲಂಗಾಣ ಉತ್ತಮ ಆಟವಾಡಿದರೂ ಎದುರಾಳಿ ತಂಡದ ಗೆಲುವು ತಡೆಯಲಾಗಲಿಲ್ಲ.

ಇನ್ನೊಂದು ಪಂದ್ಯದಲ್ಲಿ ಮಹಾರಾಷ್ಟ್ರ25–18, 25–13, 25–22ರಿಂದ ಮಧ್ಯಪ್ರದೇಶ ತಂಡಕ್ಕೆ ಸೋಲುಣಿಸಿತು. ಲೀಗ್ ಹಂತದ ಇನ್ನುಳಿದ ಹಣಾಹಣಿಗಳಲ್ಲಿ ಹಿಮಾಚಲ ಪ್ರದೇಶ 25–7, 25–14, 25–20ರಿಂದ ಹರಿಯಾಣ ಎದುರು, ತಮಿಳುನಾಡು 25–17, 25–15, 18–25, 25–16ರಿಂದ ಉತ್ತರ ಪ್ರದೇಶ ವಿರುದ್ಧ, ಪಶ್ಚಿಮ ಬಂಗಾಳ 25–21, 25–21, 25–22ರಿಂದ ಒಡಿಶಾ ಎದುರು ಜಯ ಸಾಧಿಸಿದವು.

ಕರ್ನಾಟಕಕ್ಕೆ ಎರಡನೇ ಜಯ: ಆತಿಥೇಯ ಕರ್ನಾಟಕ ತಂಡವು ಲೀಗ್ ಹಂತದಲ್ಲಿ ಎರಡನೇ ಜಯ ಗಳಿಸಿತು. ಮಂಗಳವಾರ ಸಂಜೆ ನಡೆದ ಪಂದ್ಯದಲ್ಲಿ 3–0ಯಿಂದ ದೆಹಲಿ ತಂಡಕ್ಕೆ ಸೋಲುಣಿಸಿತು. ಮೊದಲ ಪಂದ್ಯದಲ್ಲಿ ರಾಜ್ಯ ತಂಡ ಪಂಜಾಬ್‌ಅನ್ನು ಮಣಿಸಿ ಶುಭಾರಂಭ ಮಾಡಿತ್ತು.