ಮೈಸೂರು: ಬೆಂಗಳೂರಿನ ಅರ್ಜುನ್ ಟ್ರ್ಯಾಕ್ ಮತ್ತು ಫೀಲ್ಡ್ನ ಪ್ರಿಯಾ ಎಚ್.ಮೋಹನ್ ಅವರು ರಾಜ್ಯ ಯೂತ್ (18 ವರ್ಷ ವಯಸ್ಸಿನೊಳಗಿನವರು) ಅಥ್ಲೆಟಿಕ್ಸ್ನಲ್ಲಿ ಬಾಲಕಿಯರ 200 ಮೀಟರ್ಸ್ ಓಟದಲ್ಲಿ ನೂತನ ದಾಖಲೆಯೊಂದಿಗೆ ಚಿನ್ನ ಗೆದ್ದರು.
ಕರ್ನಾಟಕ ರಾಜ್ಯ ಅಥ್ಲೆಟಿಕ್ ಸಂಸ್ಥೆ ಮತ್ತು ಮೈಸೂರು ಜಿಲ್ಲಾ ಅಥ್ಲೆಟಿಕ್ ಸಂಸ್ಥೆ ಆಶ್ರಯದಲ್ಲಿ ಚಾಮುಂಡಿ ವಿಹಾರ ಕ್ರೀಡಾಂಗಣದಲ್ಲಿ ಶನಿವಾರ ಆರಂಭವಾದ ಕೂಟದಲ್ಲಿ ಅವರು 24.70 ಸೆಕೆಂಡುಗಳಲ್ಲಿ ಗುರಿ ತಲುಪಿದರು. ಎಂ.ಆರ್.ಪೂವಮ್ಮ (24.8 ಸೆ., 2007 ರಲ್ಲಿ) ಮತ್ತು ನಿರುಪಮಾ ಸುಂದರರಾಜ್ (24.8 ಸೆ., 2009 ರಲ್ಲಿ) ಹೆಸರಿನಲ್ಲಿದ್ದ ದಾಖಲೆಯನ್ನು ಅವರು ಮುರಿದರು.