ಮಂಗಳವಾರ, ಅಕ್ಟೋಬರ್ 19, 2021
24 °C

ಟೆನಿಸ್ ಚಾಂಪಿಯನ್‌ಷಿಪ್‌: ರೋಚಕ ಹಣಾಹಣಿ ಗೆದ್ದ ಜೈನಾ ಸೆಮಿಫೈನಲ್‌ಗೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಬೆಂಗಳೂರು: ಅಗ್ರ ಶ್ರೇಯಾಂಕಿತೆ ಜೈನಾ ಅಂಬರ್ ಮತ್ತು  ನಾಲ್ಕನೇ ಶ್ರೇಯಾಂಕಿತ ಬಿ.ಶೌರ್ಯ, ರಾಜ್ಯ ಲಾನ್ ಟೆನಿಸ್ ಸಂಸ್ಥೆಯ ಆಶ್ರಯದಲ್ಲಿ ನಡೆಯುತ್ತಿರುವ ಎಐಟಿಎ 14 ವರ್ಷದೊಳಗಿನವರ ಸಿಎಸ್‌–7 ಟೆನಿಸ್ ಚಾಂಪಿಯನ್‌ಷಿಪ್‌ನಲ್ಲಿ ಕ್ರಮವಾಗಿ ಬಾಲಕಿಯರ ಮತ್ತು ಬಾಲಕರ ವಿಭಾಗದ ಸೆಮಿಫೈನಲ್ ಪ್ರವೇಶಿಸಿದರು.

ಬಾಲಕಿಯರ ವಿಭಾಗದ ಎಂಟರ ಘಟ್ಟದಲ್ಲಿ ಕರ್ನಾಟಕದ ಜೈನಾ ಮತ್ತು ದಿಶಾ ಸಂತೋಷ್‌ ನಡುವಿನ ಪಂದ್ಯ ರೋಚಕವಾಗಿತ್ತು. 4-6, 7-5, 6-3ರಲ್ಲಿ ಜೈನಾ ಜಯಭೇರಿ ಮೊಳಗಿಸಿದರು. ಮೊದಲ ಸೆಟ್‌ನಲ್ಲಿ 4–6ರ ಸೋಲು ಕಂಡಿದ್ದ ಜೈನಾ ಎರಡನೇ ಸೆಟ್‌ನಲ್ಲಿ 3–5ರ ಹಿನ್ನಡೆಯಲ್ಲಿದ್ದರು. ನಿರ್ಣಾಯಕ ಹಂತದಲ್ಲಿ ಮೂರು ಮ್ಯಾಚ್ ಪಾಯಿಂಟ್‌ಗಳನ್ನು ಬಿಟ್ಟುಕೊಟ್ಟು ಇನ್ನೇನು ಸೋತೇ ಬಿಡುತ್ತಾರೆ ಎಂಬ ಪರಿಸ್ಥಿತಿಯಲ್ಲಿದ್ದರು.

ಈ ಸಂದರ್ಭದಲ್ಲಿ ಪುಟಿದೆದ್ದ 13ರ ಹರೆಯದ ಜೈನಾ ನಾಲ್ಕು ಗೇಮ್‌ಗಳನ್ನು ಗೆದ್ದುಕೊಂಡು ಎರಡನೇ ಸೆಟ್ ತಮ್ಮದಾಗಿಸಿಕೊಂಡರು. ಮುಂದಿನ ಸೆಟ್‌ನಲ್ಲಿ ಭರ್ಜರಿ ತಿರುಗೇಟು ನೀಡಿದ ಅವರು 6–3ರಲ್ಲಿ ಜಯ ಗಳಿಸಿ ಪಂದ್ಯವನ್ನು ಗೆದ್ದುಕೊಂಡರು.

ಬಾಲಕರ ವಿಭಾಗದಲ್ಲಿ ಶೌರ್ಯ ಪ್ರಬಲ ಪೈಪೋಟಿಯಲ್ಲಿ ಐದನೇ ಶ್ರೇಯಾಂಕದ ಕೆ.ಲತೀಶ್‌ ಎದುರು 7-6 (8), 6-3ರಲ್ಲಿ ಜಯ ಗಳಿಸಿದರು. ಅಗ್ರ ಶ್ರೇಯಾಂಕಿತ, ಮಣಿಪುರದ ಅಶ್ವಜೀತ್‌ 6-1, 7-5ರಲ್ಲಿ ಸಂಚಿತ್ ರಾವ್ ವಿರುದ್ಧ ಗೆಲುವು ಸಾಧಿಸಿದರೆ ಎರಡನೇ ಶ್ರೇಯಾಂಕದ ಡಿ.ಆರಾಧ್ಯ 6-0, 6-0ಯಿಂದ ಸಫೂರ್ ಮೊಯ್ದೀನ್ ವಿರುದ್ಧ, ಮೂರನೇ ಶ್ರೇಯಾಂಕದ ಕ್ಷಿತಿಜ್ ಆರಾಧ್ಯ 6-3, 2-6, 6-0ರಲ್ಲಿ ಬಾಬು ಕ್ರಿಸ್ಟೊ ವಿರುದ್ಧ ಗೆದ್ದರು.

ಬಾಲಕಿಯರ ವಿಭಾಗದ ನಾಲ್ಕರ ಘಟ್ಟದ ಹಣಾಹಣಿಯಲ್ಲಿ ಜೈನಾ ಅವರು ಸುಶ್ಮಿತಾ ರವಿ ವಿರುದ್ಧ ಸೆಣಸುವರು. ಮೂರನೇ ಶ್ರೇಯಾಂಕಿತೆ, ತಮಿಳುನಾಡಿನ ಸಮೃದ್ಧಿ ಎದುರಿನ ಪಂದ್ಯದಲ್ಲಿ ಐದನೇ ಶ್ರೇಯಾಂಕದ ಸುಶ್ಮಿತಾ 6-0, 6-2ರಲ್ಲಿ ಗೆಲುವು ಸಾಧಿಸಿದರು. ಶ್ರೇಯಾಂಕರಹಿತ ಆಟಗಾರ್ತಿ ತಮಿಳುನಾಡಿನ ದಿವ್ಯಾ ರಮೇಶ್ ಧನ್ಯತಾ ಧರಣಿ ಎದುರು 6-2, 6-2ರಲ್ಲಿ ಜಯ ಸಾಧಿಸಿದರು. ಎರಡನೇ ಶ್ರೇಯಾಂಕಿತೆ ಅಣ್ವಿ ಪುನಗಂಟಿ 6-3, 6-2ರಲ್ಲಿ ಏಳನೇ ಶ್ರೇಯಾಂಕದ ವಾರುಣ್ಯ ಎದುರು ಗೆದ್ದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು