ಬೆಂಗಳೂರು: ದಯಾನಂದ ಸಾಗರ ವಿಶ್ವವಿದ್ಯಾಲಯದಲ್ಲಿ ಇದೇ 20 ಮತ್ತು 21ರಂದು ನಾಸಾ ಸ್ಪೇಸ್‌ ಆ್ಯಪ್ ಚಾಲೆಂಜ್‌ 2018 ಹ್ಯಾಕಥಾನ್‌ನಡೆಯಲಿದೆ.
ನಾಸಾ ಸಂಸ್ಥೆಯು ಪ್ರಪಂಚದ 200 ನಗರಗಳಲ್ಲಿ ಈ ಸ್ಪರ್ಧೆಯನ್ನು ಆಯೋಜಿಸಿದೆ. ಆರು ವಿಭಾಗಗಳಲ್ಲಿ 25 ತಾಂತ್ರಿಕ ಸವಾಲುಗಳನ್ನು ಸ್ಪರ್ಧಿಗಳಿಗೆ ನೀಡಲಾಗುತ್ತದೆ. ಆಸಕ್ತರು ಉಚಿತವಾಗಿ ಹೆಸರನ್ನು ನೋಂದಾಯಿಸಿಕೊಂಡು ಸ್ಪರ್ಧೆಯಲ್ಲಿ ಭಾಗವಹಿಸಬಹುದಾಗಿದೆ.
ಇಲ್ಲಿ ವಿಜೇತರಾಗುವ 2 ತಂಡಗಳು ಜಾಗತಿಕ ಮಟ್ಟದ ಸ್ಪರ್ಧೆಗೆ ಅರ್ಹತೆ ಪಡೆಯಲಿವೆ. ಅಲ್ಲಿಯೂ ಗೆದ್ದವರು ಯುಎಸ್‌ಎ ಕೆನಡಿ ಬಾಹ್ಯಾಕಾಶ ಕೇಂದ್ರಕ್ಕೆ ಭೇಟಿ ನೀಡುವ ಅವಕಾಶ ಗಳಿಸುತ್ತಾರೆ.
ವಿಜೇತರು ಸೂಚಿಸುವ ತಾಂತ್ರಿಕ ಪರಿಹಾರೋಪಾಯಗಳನ್ನು ನಾಸಾ ತನ್ನ ಸುಧಾರಿತ ತಂತ್ರಾಂಶಗಳಲ್ಲಿ ಅಳವಡಿಸಿಕೊಳ್ಳಲಿದೆ ಎಂದು ವಿಶ್ವವಿದ್ಯಾಲಯ ಪ್ರಕಟಣೆಯಲ್ಲಿ ತಿಳಿಸಿದೆ.
