ಬೇಸಿಗೆಯಲ್ಲಿ ಮಕ್ಕಳ ಮೋಜಿಗೆ ಚಿಣ್ಣರ ರೈಲಿನ ಸಾಥ್

ಇಲ್ಲಿನ ನಗರಸಭೆ ಆವರಣದಲ್ಲಿ 2017ರ ಅಂಬೇಡ್ಕರ್‌ ಜಯಂತಿಯ ದಿನ ಚಿಣ್ಣರ ರೈಲು ಆರಂಭವಾಗಿದೆ. ಈ ಶನಿವಾರ ಅದಕ್ಕೆ ಮೊದಲ ವಾರ್ಷಿಕೋತ್ಸವದ ಸಂಭ್ರಮ. ಇಲ್ಲಿಯವರೆಗೂ ವಾರಾಂತ್ಯದ ಶನಿವಾರ ಹಾಗೂ ಭಾನುವಾರ ಮಾತ್ರ ರೈಲು ಓಡಾಟ ನಡೆಸುತ್ತಿತ್ತು. ಸರ್ಕಾರಿ ರಜೆ ಇರುವ ದಿನ ಜನರ ಸಂಖ್ಯೆ ನೋಡಿ ರೈಲು ಓಡಿಸಲಾಗುತ್ತಿತ್ತು. ಉಳಿದ ದಿನಗಳಲ್ಲಿ ಓಡಾಟ ಸ್ಥಗಿತಗೊಳ್ಳುತ್ತಿತ್ತು. ‘ಈಗ ಶಾಲೆಗಳಿಗೆ ಬೇಸಿಗೆ ರಜೆ ಆರಂಭವಾಗಿದೆ. ನಗರಸಭೆ ಉದ್ಯಾನಕ್ಕೆ ಮಕ್ಕಳ ಕರೆತರುವವರ ಸಂಖ್ಯೆಯೂ ಹೆಚ್ಚಿದೆ. ಬಿಸಿಲು ಇಳಿಮುಖವಾಗುತ್ತಿದ್ದಂತೆಯೇ ಉದ್ಯಾನಕ್ಕೆ ಮಕ್ಕಳು ದಾಂಗುಡಿ ಇಡುತ್ತಿವೆ. ಆದರೆ ಆಟಿಕೆ ರೈಲು ಇಲ್ಲದೇ ನಿರಾಶೆಗೊಳಗಾಗುತ್ತಿದ್ದಾರೆ. ಹಾಗಾಗಿ ಸಾರ್ವಜನಿಕರ ಬೇಡಿಕೆ ಮನ್ನಿಸಿಯೇ ರಜೆ ಮುಗಿಯುವವರೆಗೂ ಪ್ರತೀ ದಿನ ಸಂಜೆ ರೈಲು ಓಡಿಸಲು ನಿರ್ಧರಿಸಲಾಗಿದೆ’ ಎಂದು ನಗರಸಭೆ ಆಯುಕ್ತ ಗಣಪತಿ ಪಾಟೀಲ ಹೇಳುತ್ತಾರೆ.

ಗುಜರಾತ್‌ ರೈಲು: ನಗರದ ಮಕ್ಕಳ ಮನರಂಜನೆಗಾಗಿ ನಗರಸಭೆ ಆಡಳಿತ ₹ 20 ಲಕ್ಷ ವೆಚ್ಚದಲ್ಲಿ ಗುಜರಾತ್‌ನಿಂದ ನಾಲ್ಕು ಬೋಗಿಗಳ ಈ ಪುಟ್ಟ ರೈಲು ತರಿಸಿದೆ. ಅದರ ಓಡಾಟಕ್ಕೆ 900 ಮೀಟರ್‌ ವಿಸ್ತೀರ್ಣದಲ್ಲಿ ಹಳಿ ಜೋಡಣೆ ಮಾಡಲಾಗಿದೆ. ವಿದ್ಯುತ್‌ ಚಾಲಿತ ಈ ರೈಲು ಪರಿಸರ ಸ್ನೇಹಿ. ಪ್ರತಿ ಬೋಗಿಯಲ್ಲಿ ನಾಲ್ವರು ದೊಡ್ಡವರು ಇಲ್ಲವೇ ಆರು ಮಂದಿ ಮಕ್ಕಳು ಕೂರಲು ಸ್ಥಳಾವಕಾಶವಿದೆ. ರೈಲಿನ ನಿರ್ವಹಣೆಗೆ ನಗರಸಭೆಯಿಂದಲೇ ಇಬ್ಬರು ಸಿಬ್ಬಂದಿ ನೇಮಕ ಮಾಡಲಾಗಿದೆ.

ಭರಪೂರ ಮನರಂಜನೆ: ನಗರಸಭೆ ಆವರಣದಲ್ಲಿ ಆಟಿಕೆ ರೈಲಿನ ಜೊತೆಗೆ ಮಕ್ಕಳ ಸ್ನೇಹಿ ಉದ್ಯಾನವನ ರೂಪಿಸಲಾಗಿದೆ. ಅವರಿಗೆ ಮೋಜಿನ ಜೊತೆಗೆ ದೈಹಿಕ ಕಸರತ್ತಿಗೆ ನೆರವಾಗಲು ₹ 4 ಲಕ್ಷ ವೆಚ್ಚದಲ್ಲಿ ಸಾಹಸ ಕ್ರೀಡೆಯ ಉಪಕರಣಗಳ ವ್ಯವಸ್ಥೆ ಮಾಡಲಾಗಿದೆ. ಡ–ಮರಗಳ ನೆರಳಿನ ನಡುವೆ ಮಕ್ಕಳ ಮನ ಸೆಳೆಯಲು ಉಬ್ಬುಶಿಲ್ಪ, ಚಿತ್ರಗಳಿವೆ. ದೊಡ್ಡವರಿಗೆ ವಾಕಿಂಗ್‌ ಟ್ರ್ಯಾಕ್ ನಿರ್ಮಿಸಲಾಗಿದೆ. ಸಂಗೀತ, ನೃತ್ಯ, ನಾಟಕ ಸೇರಿದಂತೆ ಮಕ್ಕಳ ಪ್ರತಿಭೆ ಪ್ರದರ್ಶನ ಹಾಗೂ ಮನರಂಜನೆ ಕಾರ್ಯಕ್ರಮ ನಡೆಸಲು ವೇದಿಕೆ ಕಲ್ಪಿಸಲಾಗಿದೆ. ಒಟ್ಟಾರೆ ಇಲ್ಲಿ ಭರಪೂರ ಮನರಂಜನೆ ಲಭ್ಯವಿದೆ ಎಂದು ಗಣಪತಿ ಪಾಟೀಲ ಹೇಳುತ್ತಾರೆ.

ರೈಲಿನ ಹೆಸರು: ಕೋಟೆ ಎಕ್ಸ್‌ಪ್ರೆಸ್
ಟಿಕೆಟ್ ಬೆಲೆ :
ದೊಡ್ಡವರಿಗೆ: ₹ 10
ಮಕ್ಕಳಿಗೆ:₹ 5

ಒಟ್ಟು ಬೋಗಿ: 4

ಸಮಯ: ಸಂಜೆ 4.30ರಿಂದ 6.30

**

ಸಾರ್ವಜನಿಕರ ಬೇಡಿಕೆ ಹಿನ್ನೆಲೆಯಲ್ಲಿ ಬೇಸಿಗೆ ರಜೆ ಮುಗಿಯುವವರೆಗೂ ವಾರದ ಎಲ್ಲ ದಿನ ಸಂಜೆ ಚಿಣ್ಣರ ರೈಲಿನ ಸಂಚಾರ ಆರಂಭಿಸಲು ನಿರ್ಧರಿಸಲಾಗಿದೆ - ಗಣಪತಿ ಪಾಟೀಲ, ನಗರಸಭೆ ಆಯುಕ್ತ.

**