ಸೋಲ್‌: ಉತ್ತರ ಕೊರಿಯಾದ ಪರಮೋಚ್ಛ ನಾಯಕ ಕಿಮ್‌ ಜಾಂಗ್‌ ಉನ್‌ ಅವರ ಆರೋಗ್ಯ ಕುರಿತಂತೆ ದಿನದಿನಕ್ಕೆ ಕುತೂಹಲ ಹೆಚ್ಚುತ್ತಿದ್ದರೆ, ಇನ್ನೊಂದೆಡೆ ವದಂತಿಗಳೂ ಹಬ್ಬುತ್ತಿವೆ.
ಕಿಮ್‌ ಅವರ ಬಳಕೆಗೆಂದೇ ಮೀಸಲಾಗಿರುವ ರೈಲನ್ನು ದೇಶದ ಪೂರ್ವ ಕರಾವಳಿಯಲ್ಲಿರುವ ಅವರ ನಿವಾಸದ ಆವರಣದಲ್ಲಿಯೇ ನಿಲುಗಡೆ ಮಾಡಿರುವ ದೃಶ್ಯಗಳನ್ನು ಉಪಗ್ರಹವೊಂದು ಸೆರೆ ಹಿಡಿದಿದೆ. ಈ ಚಿತ್ರಗಳನ್ನು ‘38 ನಾರ್ಥ್‌’ ಎಂಬ ಜಾಲತಾಣ ಬಿಡುಗಡೆ ಮಾಡಿದ್ದು, ಹಲವು ಊಹಾಪೋಹಗಳಿಗೆ ಕಾರಣವಾಗಿದೆ.
ಉತ್ತರ ಕೊರಿಯಾಕ್ಕೆ ಸಂಬಂಧಿಸಿದ ವಿದ್ಯಮಾನಗಳಿಗೆ ಆದ್ಯತೆ ನೀಡುವ ಈ ಜಾಲತಾಣ, ಕಿಮ್‌ ಅವರ ಆರೋಗ್ಯ ಸಮಸ್ಯೆಗಳ ಬಗ್ಗೆ ಯಾವುದೇ ಮಾಹಿತಿಯನ್ನು ಪ್ರಕಟಿಸಿಲ್ಲ. ಆದರೆ, ಕಿಮ್‌ ರಾಜಧಾನಿಯಲ್ಲಿಲ್ಲ ಎಂಬ ದಕ್ಷಿಣ ಕೊರಿಯಾ ಗುಪ್ತಚರ ಇಲಾಖೆ ಮಾಹಿತಿಯನ್ನು ಈ ಚಿತ್ರಗಳು ಪುಷ್ಟೀಕರಿಸುತ್ತವೆ ಎಂದು ಹೇಳಲಾಗಿದೆ.
